आईसीटी समाचार
आज पनि धेरै मानिसहरूले आफ्नो स्मार्टफोनको पावर बटनलाई केवल फोन अन वा अफ गर्न मात्र प्रयोग गर्छन्। तर यो सानो बटनले तपाईंको फोनका धेरै महत्वपूर्ण फिचरहरू पनि नियन्त्रण गर्न सक्छ। सही सेटिङ मिलाएपछि पावर बटनले धेरै कामलाई छिटो र सजिलो बनाइदिन्छ, जसले गर्दा फोन प्रयोग अझ स्मार्ट र सहज हुन्छ। यहाँ पावर बटनका पाँच उपयोगी प्रयोगबारे जानकारी दिइएको छ।
१) छिटो क्यामेरा खोल्ने सुविधा
आइफोनमा अहिले विशेष क्यामेरा कन्ट्रोल बटन पाइन्छ। तर एन्ड्रोइड फोन प्रयोगकर्ताले पनि पावर बटनलाई क्यामेरा खोल्ने बटनका रूपमा प्रयोग गर्न सक्छन्।
कहिलेकाहीँ कुनै विशेष क्षण अचानक आउँछ र क्यामेरा खोल्ने क्रममा त्यो मौका छुट्न सक्छ। यस्तो अवस्थामा पावर बटनलाई दुई पटक थिचेर तुरुन्तै क्यामेरा खोल्न सकिन्छ। यसले केही सेकेन्डमै क्यामेरा खुल्छ र तपाईं तुरुन्तै फोटो खिच्न सक्नुहुन्छ।
२) एआई असिस्टेन्ट सक्रिय गर्न
आजकल अधिकांश स्मार्टफोनमा पावर बटन लामो समयसम्म थिच्दा एआई असिस्टेन्ट जस्तै जेमिनी वा अन्य भ्वाइस असिस्टेन्ट सक्रिय हुन्छ।
यसको प्रयोग गरेर प्रयोगकर्ताले प्रश्न सोध्न, कसैलाई फोन गर्न वा साना–साना कामहरू फोनलाई हातले नछोइकनै गर्न सक्छन्।
३) टर्च छिटो अन वा अफ गर्न
अँध्यारोमा धेरै पटक फोनको फ्ल्याश अन गर्न फोन अनलक गर्नुपर्ने हुन्छ। तर धेरै स्मार्टफोनमा पावर बटनमार्फत टर्च अन वा अफ गर्ने विकल्प पनि दिइएको हुन्छ।
एक पटक सेटिङमा गएर यो सुविधा सक्रिय गरेपछि आवश्यक पर्दा केवल एक प्रेसमै टर्च अन गर्न सकिन्छ।
४) इमरजेन्सी SOS फिचर
पावर बटनको सबैभन्दा महत्वपूर्ण प्रयोग इमरजेन्सी SOS फिचर हो। सुरक्षा दृष्टिले यो निकै उपयोगी मानिन्छ।
यदि यो सेटिङ सक्रिय गरिएको छ भने पावर बटनलाई ३ वा ५ पटक थिच्दा फोनले स्वतः इमरजेन्सी कन्ट्याक्टहरूलाई लोकेशनसहित आवश्यक जानकारी पठाउन सक्छ। कठिन अवस्थामा यो सुविधा निकै सहयोगी हुन सक्छ।
५) एक प्रेसमा कल कट गर्ने
फोनको सेटिङमा गएर पावर बटनलाई इनकमिङ वा चलिरहेको फोन कल अन्त्य गर्ने विकल्पका रूपमा पनि प्रयोग गर्न सकिन्छ।
‘प्रेस पावर बटन टु एन्ड कल’ विकल्प सक्रिय गरेपछि पावर बटन एक पटक थिचेर कुनै पनि कल तुरुन्तै समाप्त गर्न सकिन्छ। यसले फोन प्रयोगलाई अझ छिटो र सहज बनाउँछ।
