आईसीटी समाचार
अष्ट्रेलियाको सरकारी प्रसारण संस्था एबीसीका कर्मचारीले एआईले पत्रकारहरूलाई विस्थापित नगर्ने सुनिश्चितता, तलब वृद्धि, र काम गर्ने अवस्थाको माग गर्दै २४ घण्टे हड्ताल गरेका छन्। यो आन्दोलन करिब २० वर्षपछि भएको सबैभन्दा ठूलो औद्योगिक कदम मानिएको छ, जसका कारण एबीसीका टेलिभिजन, रेडियो र डिजिटल सेवामा अवरोध पुगेको छ र केही कार्यक्रमको सट्टा बीबीसी वर्ल्ड सर्भिस प्रसारण गरिएको छ।
कर्मचारीहरूका अनुसार एआईको बढ्दो प्रयोगले पत्रकारिता पेशाको भविष्य नै असुरक्षित बन्ने खतरा देखिएको छ। उनीहरूले व्यवस्थापनसँग एआई प्रयोगको स्पष्ट नीति, कामको सुरक्षा, र मानवीय श्रमलाई प्राथमिकता दिने प्रतिबद्धता मागेका छन्। उनीहरूको भनाइमा, एआईलाई सहयोगी उपकरणको रूपमा प्रयोग गर्न सकिन्छ, तर मानव पत्रकारलाई विस्थापित गर्ने गरी प्रयोग गरिनु हुँदैन।
रिपोर्टअनुसार कर्मचारीहरूले तीन वर्षमा प्रस्तावित १० प्रतिशत तलब वृद्धि अपर्याप्त भएको बताएका छन्, किनकि मुद्रास्फीति अझै उच्च छ। उनीहरूले काममा एआईको प्रयोगबारे स्पष्ट सुरक्षा ग्यारेन्टी,रात्री सेवाको अतिरिक्त भत्ता, प्रजनन स्वास्थ्य बिदा पनि मागेका छन्। एबीसी व्यवस्थापनले भने बजेट सीमित भएकाले प्रस्ताव उचित भएको दाबी गरेको छ।
मिडिया, इन्टरटेनमेन्ट एण्ड आर्ट्स एलायन्सका अनुसार यो आन्दोलन केवल तलबको विषय नभई भविष्यको पत्रकारिता, प्रविधि र रोजगारीको सुरक्षासँग जोडिएको मुद्दा हो। एआईको तीव्र विकाससँगै विश्वभर मिडिया उद्योगमा यस्ता बहसहरू बढ्दै गएका छन्, र एबीसीको यो आन्दोलन त्यसैको एउटा प्रतिनिधि उदाहरण बनेको छ। मिडिया, इन्टरटेनमेन्ट एण्ड आर्ट्स एलायन्स (एम.ई.ए.ए.) का अनुसार व्यवस्थापनले कर्मचारीको सम्मान नगरेसम्म र उचित सम्झौता नभएसम्म आन्दोलन जारी रहने देखिन्छ ।
