आईसीटी समाचार
सन् २०१० नोभेम्बर ११ मा स्थापना भएको नेपालको पहिलो अनलाइन फुड डेलिभरी कम्पनी फुडमाण्डुले आफ्नो १५औँ वार्षिकोत्सव मनाएको छ ।
सुरुआतमा सानो स्टार्टअपका रूपमा सुरु भएको फुडमाण्डुले आज १५ वर्षको यात्रामा उल्लेखनीय सफलता हासिल गरेको छ । कम्पनीले नेपालभरका थुप्रै ग्राहक र रेस्टुरेन्टहरूलाई जोड्दै एक परिचित ब्रान्डको रूपमा आफूलाई स्थापित गराइसकेको छ ।
हाल फुडमाण्डुले काठमाडौं, ललितपुर, भक्तपुर, पोखरा, चितवन र बुटवलका हजारौँ रेस्टुरेन्टसँग साझेदारी गरी धेरै डेलिभरी राइडरहरूका लागि रोजगारीको अवसर समेत सिर्जना गरेको छ ।
वार्षिकोत्सवको अवसरमा फुडमाण्डुका संस्थापक तथा प्रबन्ध निर्देशक मनोहर अधिकारीले पन्ध्र वर्षअघि ग्राहकलाई घरमै मनपर्ने खाना सजिलै पाउने सोचका साथ फुडमाण्डुको सुरुआत भएको सम्झिए । ‘आज हामीले पाएको सफलता हाम्रो लागि गर्वको विषय हो । फुडमाण्डुले ग्राहकहरूको खाना अर्डर गर्ने तरिका मात्र परिवर्तन गरेको छैन, रेस्टुरेन्टहरूलाई थप ग्राहकसम्म पुग्न र व्यवसाय बढाउन पनि सहयोग पुर्याएको छ,’ उनले भने ।
उनका अनुसार यो उपलब्धि फुडमाण्डुका रेस्टुरेन्ट पार्टनर्स, समर्पित राइडरहरू र सन्तुष्ट ग्राहकहरूकै कारण सम्भव भएको हो ।
कम्पनीले अझ बढी रेस्टुरेन्टहरू जोड्ने, भरपर्दो डेलिभरी सेवा दिने, अर्डर प्रक्रिया सजिलो बनाउने र नेपालीदेखि अन्तर्राष्ट्रिय स्वादसम्मका विविध परिकार उपलब्ध गराउने लक्ष्य राखेको छ ।
फुडमाण्डुकी ब्रान्ड तथा मार्केटिङ म्यानेजर इनेशा भट्टराईले पहिलो दिनजस्तै उत्साहका साथ ‘खानासँगै खुसी’ डेलिभरी गर्ने प्रतिबद्धतामा निरन्तर काम गरिरहेको बताइन ।
यो पनि पढ्नुहोस्ः फुड डेलिभरीमा ‘क्रान्ति’ ल्याउने मनोहर
१५औँ वार्षिकोत्सवको अवसरमा फुडमाण्डुले कात्तिक २५ देखि मंसिर १४ गतेसम्म विशेष अफर ल्याएको छ । यस अन्तर्गत काठमाडौं, पोखरा, चितवन र बुटवलका २०० भन्दा बढी रेस्टुरेन्टहरूमा विभिन्न परिकारमा छुट उपलब्ध हुनेछ ।
हाल फुडमाण्डुले १,००० भन्दा बढी रेस्टुरेन्टमार्फत काठमाडौं, ललितपुर, भक्तपुर, पोखरा, चितवन र बुटवलमा सेवा दिइरहेको छ । साथै, फुडमाण्डु वनमार्टमार्फत दैनिक उपभोग्य सामग्रीको तत्काल डेलिभरी सेवा पनि प्रदान गर्दै आएको छ ।
यसरी सुरू भएको थियो फुडमाण्डु
सन् २०१० तिर नेपालीहरू स्मार्टफोन र इन्टरनेटसँग भर्खर भर्खर परिचित हुन थालेका थिए । एकदमै कम व्यक्तिसँग मात्र इन्टरनेट र स्मार्टफोनको पहुँच थियो ।
झन अनलाइन व्यवसाय त नेपालीका लागि अनौठो कल्पना नै थियो । यस्तो अवस्थामा काठमाडौंका मनोहर अधिकारीले अनलाइन व्यवसाय सुरू गर्ने अठोट लिए ।
आईडिया, अठोट र दृढ इच्छाशक्तिले सन् २०१० मा सुरू भयो नेपालकै पहिलो अनलाइन फुड डेलिभरी प्लेटफर्म ‘फुडमाण्डु’ । जतिबेला विश्वभर नै अनलाइन फुड डेलिभरी भर्खर भर्खर सुरू हुन थालेको थियो ।
अमेरिकी आईटी कम्पनी डिटुहकाईको नेपाल कार्यालयमा काम गर्दा फुडमाण्डुको अवधारणा मनोहरको दिमागमा आएको थियो । सन् २००४ देखि सन् २००६ सम्म उनले डिटुहकाईको नेपाल कार्यालय विशालनगरमा काम गरेका थिए ।
काम गर्दा प्राय जसो लञ्च आवर (खाना/खाजा खाने समय) मा के खाने, कहाँ खाने ? भन्ने समस्या हुन्थ्यो । वरिपरि खासै रेष्टुरेन्ट पनि थिएनन् । अफिसबाट नजिकको रेष्टुरेन्टमा जान हिडेर १०-१५ मिनेट लाग्थ्यो । त्यो बेला बालुवाटर र बालाजु चोकमा थियो रेष्टुरेन्ट । त्यो समस्या आफ्नो मात्र नभएर धेरै जनाको भएको उनलाई त्यतिबेला नै लागिसकेको थियो ।
यत्तिकैमा डिटुहकाईमा २ वर्ष काम गरेपछि आफ्नै सफ्टवेयर आउटसोर्सिङ कम्पनी ‘स्टर्डी सफ्टवेयर सोलुसन’ स्थापना गरेर काम गर्न थाले । सन् २०१० सम्म आउँदा मनोहरलाई आफ्नै प्रडक्टमा काम गर्नुपर्छ भन्ने लागिसकेको थियो । विभिन्न आईडियाहरू समेत आईरहेका थिए ।
प्रविधिमै काम गरिरहेका उनलाई प्रडक्ट पनि प्रविधि जोडेरै बनाउन मन थियो । डिटुहकाईमा काम गर्दा भोगेको समस्यालाई ‘इन्नोभेटिभ’ तरिकाले समाधान गर्ने निधोसहित फुडमाण्डु सुरू गरेको संस्थापक मनोहर अधिकारी बताउँछन् । फुडमाण्डु सुरू गरेपछि फुड अर्डर गर्ने प्लेटफर्म बन्यो । त्यो सफ्टवेयरको विकास मनोहर आफैले गरेका थिए ।
त्यसो त उनी कुनै व्यवसायिक पृष्ठभूमिबाट आएका व्यक्ति होइनन । उनीसँग कुनै ठूलो योजना पनि थिएन । फुडमाण्डु सुरू गरेपछि चलिहाल्छ नि भन्ने एक किसिमको उत्साह पनि थियो । तर उत्साह धेरै दिन टिकेन । व्यवसाय सुरू गरेपछि अनके चुनौती देखिन थाले । एकातिर बिजनेस मोडलबारे रेष्टुरेन्टलाई बुझाउन गार्हो थियो भने अर्कोतिर ग्राहक पनि अवयेर थिएनन् ।
‘मैले भोगेको समस्या अरूले पनि भोगेका हुन सक्छन् भन्ने लागेको थियो । फुडमाण्डु सुरू गर्दा एक किसिमको उत्साह थियो र चलिहाल्छ नि भन्ने थियो । तर सुरू सुरूमा खासै चलेन । धेरै चुनौती भोग्नु पर्यो । रेष्टुरेन्टलाई बुझाउनै गार्हो थियो । ग्राहक पनि जानकार थिएनन,’ उनले आइसिटी समाचारसँग सुरूवाती दिन सम्झिए ।
डेलिभरीका लागि लजिष्टिक व्यवस्थापन गर्न धेरै समस्या थियो । डेलिभरी गर्ने थर्मल ब्याग पनि नेपालमा उपलब्ध थिएन । म्यापको सेवा थिएन । गूगल म्याप पनि अहिले जस्तो लोकप्रिय थिएन । स्मार्टफोन पनि सिमितको हातमा थियो ।
अहिले पनि एकुरेट लोकेसनमा पुग्न कठिन छ । डेलिभरी गर्नेलाई हप्तौंसम्म प्रशिक्षण गर्नुपर्थ्यो । कर्मचारी रिटेन्सन र सञ्चानमा पनि समस्या थियो । तर जुनसुकै अवस्थामा पनि परिवारको साथ भने उनलाई सधैं रह्यो ।
सुरूवाती दिनमा अनेक उतारचढाव भएपनि भविष्यमा फुडमाण्डु ‘सफल व्यवसाय’ बन्नेमा मनोहर ढुक्क थिए । सानो आकारमा अर्डर आएपनि बजारले आईडिया भ्यालिडेट गरिसकेको थियो । रिपिट अर्डरहरू पनि आइरहेका थिए ।
त्यसो त फुडमाण्डु त्यो बेला ‘अर्लि टु मार्केट’ थियो नै । सन् २०१० तिर विश्वको अनलाइन फुड बजार भर्खर भर्खर उदाउँदो थियो । नेपालमा पनि अनलाइन फुड डेलिभरी व्यवसायलाई बजारले भ्यालिडेट गरिसकेको थियो । बजारले आईडिया भ्यालिडेट गरिसकेपछि फुडमाण्डु छोड्नै मन नलागेको मनोहर सुनाउँछन् ।
सुरूवाती समयमा वेबसाइटबाट अर्डर लिने भनेर वेबसाइट बनाइएको थियो । तर अर्डर फोनबाट बढी आउथ्यो । आफुहरूले वेबसाइटबाट अर्डर लिन खोजेपनि प्रयोगकर्ता अभ्यस्त नभएका कारण फोनबाट अर्डर आउने गरेको मनोहरको बुझाइ छ ।
जब सन् २०१४ पछि उनी फुडमाण्डुमा नै फोकस भए । त्यसपछि फुडमाण्डुले झनै गति लिन थाल्यो । सन् २०१५ मा फुडमाण्डुले मोबाइल एप ल्यायो ।
आज फुडमाण्डुलाई नेपालको नम्बर वान अनलाइन फुड डेलिभरी ब्राण्ड बनाउन मनोहर सफल भएका छन् । ग्राहकले अत्याधिक रूचाइदिएका छन् । नेपालमा अनलाइन फुड डेलिभरीलाई नयाँ उद्योगको रूपमा विस्तार गर्ने पनि श्रेय उनलाई जान्छ । उद्योग आफुसँगै ग्रो हुँदा मनोहर गौरव महशुस गर्छन् ।
भन्छन्, ‘सबै काम गर्दा उद्योग आफुसँगै ग्रो भयो, त्यो चाँहि गौरव लाग्छ । अन्तर्राष्ट्रियस्तरमा पनि अनलाइन फुड डेलिभरीको उद्योग सँगसँगै ग्रो भयो । यसले हामी नेपाली पछि छैनौं, पहिलेदेखि नै गर्न सक्छौं भन्ने पनि देखाएको छ ।’
