गुगल क्यालेन्डर अब एप्पल वाचमा पनि उपलब्ध, सीमित सुविधा

गुगलले एप्पल प्रयोगकर्ताहरूका लागि चुपचाप नयाँ सुविधा थपेको छ। कम्पनीले गत हप्तामात्रै ‘गूगल क्यालेन्डर’ को एप्पल वाच संस्करण सार्वजनिक गरेको हो । एप्पल वाच प्रयोगकर्ताहरूका लागि यो नयाँ सुविधा भए पनि, यसमा सीमित मात्र कार्यहरू गर्न सकिनेछ।

नयाँ संस्करणले प्रयोगकर्तालाई सात दिनभित्रका कार्यक्रम तथा कार्यहरू सूचीका रूपमा हेर्न सकिने सुविधा दिन्छ। कार्यक्रमहरू रंगले छुट्याइएका हुन्छन् भने कुनै कार्यक्रम विस्तार गर्दा केही विवरण पनि देख्न सकिन्छ।

एपमा दुईवटा ‘complications’ पनि उपलब्ध छन्, जसले प्रयोगकर्तालाई घडीको स्क्रिनमै आजको मिति वा आगामी कार्यक्रम देखाउने सुविधा दिन्छ। तर, अन्य कुनै पनि कार्य (कार्य थप्ने, सम्पादन गर्ने आदि) गर्नको लागि प्रयोगकर्ताले आफ्नै आईफोनमा रहेको गूगल क्यालेन्डर एप खोल्नुपर्नेछ।

यो सुविधा वेयर ओएस वाचमा रहेको गूगल क्यालेन्डर एपसँग धेरै हदसम्म मिल्दोजुल्दो छ। दुवै संस्करण स्मार्टफोनमा आधारित एपमै निर्भर छन्।

यद्यपि सुविधा सीमित भए पनि, गूगल क्यालेन्डरलाई प्राथमिक टाइम म्यानेजमेन्ट टुलका रूपमा प्रयोग गर्नेहरूका लागि यो एपले दैनिक काम व्यवस्थापनमा सहजता ल्याउने अनुमान गरिएको छ।