आईसीटी समाचार
सोसल मिडियाको दुनियाँमा मेटा लगातार नयाँ प्रयोग गरिरहेको छ। यही क्रममा इन्स्टाग्रामले आफ्नो डीएम अर्थात् डाइरेक्ट मेसेजका लागि एआई भ्वाइस इफेक्ट फीचर रोलआउट गरेको छ। यो फीचर ती प्रयोगकर्ताहरूका लागि उपयोगी मानिएको छ जो आफ्ना च्याटलाई अझ रोचक बनाउँदै केही नयाँ प्रयोग गर्न चाहन्छन्।
यो केवल साधारण भ्वाइस चेन्जर मात्र होइन। इन्स्टाग्रामको यो एआई टुलले प्रयोगकर्ताको आवाजको रिदम, टोन र इमोशनसमेत बुझ्न सक्छ। अर्थात् यदि प्रयोगकर्ता रिसाएर बोलिरहेका छन् वा मजाक गरिरहेका छन् भने पनि इफेक्ट लगाएपछि त्यो भावनात्मक अभिव्यक्ति कायम रहने बताइएको छ।
जब कसैले भ्वाइस इफेक्ट प्रयोग गरेर मेसेज पठाउँछ, रिसिभरलाई प्रयोग गरिएको इफेक्ट देखिन्छ। त्यसपछि उनले त्यही इफेक्टमा ट्याप गरेर उस्तै शैलीमा तुरुन्तै रिप्लाइ पठाउन सक्ने सुविधा पनि उपलब्ध छ। यसले च्याटलाई अझ इन्टरएक्टिभ बनाउने अपेक्षा गरिएको छ।
कसरी प्रयोग गर्ने एआई भ्वाइस इफेक्ट?
यो फीचर प्रयोग गर्नका लागि प्रयोगकर्ताले निम्न चरणहरू पालना गर्न सक्छन्।
सबैभन्दा पहिले इन्स्टाग्राममा आफूले मेसेज पठाउन चाहेको व्यक्तिको च्याट थ्रेड खोल्नुहोस्। मेसेज कम्पोजरमा रहेको भ्वाइस मेसेज रेकर्डिङ बटनमा ट्याप गर्नुहोस्। त्यसपछि देखिने भ्वाइस इफेक्ट बटनमा ट्याप गरेर आफूलाई मनपर्ने इफेक्ट चयन गर्नुहोस्।
आफ्नो मेसेज रेकर्ड गर्नुहोस्। पठाउनु अघि उपलब्ध विभिन्न इफेक्टहरू जस्तै रोबोट वा क्यारेक्टर एआई प्रयोग गरेर आफ्नो आवाज कस्तो सुनिन्छ भनेर प्रिभ्यू गर्न सकिन्छ। अन्तिममा मनपरेको इफेक्ट चयन गरी सेन्ड बटन थिचेर मेसेज पठाउन सकिन्छ।
यो सुविधा इन्स्टाग्रामका एआई टुलहरूको सूचीमा थपिएको नयाँ फीचर हो। यसअघि पनि प्लेटफर्ममा एआई ब्याकड्रप, एआई स्टिकर र एआई च्याटबोटजस्ता विभिन्न सुविधा उपलब्ध छन्।
इन्स्टाग्रामको लक्ष्य प्रयोगकर्ताले एपभित्रै आफ्नो क्रिएटिभिटी देखाउन सकून् र अन्य थर्ड पार्टी एप्स प्रयोग गर्नुपर्ने आवश्यकता कम होस् भन्ने रहेको छ।
हाल यो फीचर बिस्तारै रोलआउट भइरहेको छ। यदि प्रयोगकर्ताको एपमा यो सुविधा देखिएको छैन भने प्ले स्टोर वा एप स्टोरबाट एप अपडेट गर्न सुझाव दिइएको छ।
