मिरा ईआरपीमा कर्जा व्यवस्थापन मोड्युल थपियो, सहकारीको कर्जा प्रक्रिया पूर्ण डिजिटल हुने

सहकारी क्षेत्रको डिजिटल रूपान्तरणलाई लक्ष्य बनाएको क्लाउडमा आधारित सफ्टवेयर मिरा ईआरपी (MyraERP) ले आफ्नो प्लेटफर्ममा ‘कर्जा प्रक्रिया र कागजात व्यवस्थापन’ मोड्युल थप गरेको छ। नियोसिस टेक्नोलोजीद्वारा विकसित उक्त प्रणालीले सहकारी संस्थाहरूमा कर्जा प्रवाहदेखि धितो व्यवस्थापनसम्मका प्रक्रिया डिजिटल र स्वचालित बनाउन सहयोग गर्ने कम्पनीले जनाएको छ।

कम्पनीका प्रमुख कार्यकारी अधिकृत मनोज तिवारीका अनुसार नयाँ मोड्युलले सहकारीको आन्तरिक कार्यसम्पादनलाई अझ सहज र व्यवस्थित बनाउनेछ। मिरा ईआरपीको सिंगल लगिन प्रणालीमार्फत कर्जाको सम्पूर्ण प्रोसेसिङ हुने भएकाले सदस्य पहिचानसम्बन्धी समस्या समाधान हुने र फाइभ सी एनालाइसिस, कर्जा योग्यता जाँच, धितो मूल्यांकन तथा कारोबार इतिहासको विश्लेषण प्रणालीबाटै गर्न सकिने उल्लेख छ।

यो प्रणालीले सहकारी विभागको कोपोमिस (COPOMIS) मा पठाउनुपर्ने विवरण तथा सम्पत्ति शुद्धीकरणसम्बन्धी टीटीआर (TTR) रिपोर्टहरूलाई पनि निर्धारित Excel र XML फर्म्याटमा उपलब्ध गराउने कम्पनीको दाबी छ। स्थानीय निकाय, सहकारी संघ, महासंघ र सहकारी नियमन प्राधिकरण (NCRA) का लागि आवश्यक तथ्याङ्क पनि सफ्टवेयरबाटै प्राप्त गर्न सकिने जनाइएको छ। कर्जा सूचना केन्द्रमा अनिवार्य रिपोर्टिङ गर्नुपर्ने सहकारीका लागि सो व्यवस्था पनि सफ्टवेयरमार्फत उपलब्ध गराउने तयारी भइरहेको कम्पनीले बताएको छ।

सुरक्षाका दृष्टिले आईएसओ २७००१:२०२२ प्रमाणित मिरा ईआरपीले कर्जा र धितोसम्बन्धी संवेदनशील विवरणलाई ‘डिजिटल डकुमेन्ट भल्ट’ मार्फत सुरक्षित राख्ने दाबी गरिएको छ। हालसम्म ७०० भन्दा बढी सहकारी संस्था आबद्ध भइसकेको यस प्लेटफर्मले बचत तथा ऋण व्यवस्थापन, सदस्य र शेयर व्यवस्थापन, पूर्ण लेखा प्रणाली, मोबाइल बैंकिङ र एसएमएस अलर्टजस्ता सुविधा दिँदै आएको छ। साथै, एमआर कलेक्टर एप, मौज्दात व्यवस्थापन र अनलाइन बिल भुक्तानीजस्ता मोड्युलले सहकारीलाई पेपरलेस र प्रविधिमैत्री बनाउने कम्पनीको भनाइ छ।

सास क्लाउड प्रविधिमा आधारित भएकाले अतिरिक्त भौतिक पूर्वाधार वा सर्भरको आवश्यकता नपर्ने र यसले नेपाली सहकारीहरूलाई आधुनिक बैंकिङ तथा डिजिटल वालेटसरह सुविधा उपलब्ध गराउने दाबी पनि कम्पनीले गरेको छ।