आईसीटी समाचार
यदि तपाईं विन्डोज १० प्रयोगकर्ता हुनुहुन्छ भने यो खबर तपाईंका लागि अत्यन्त आवश्यक छ। माइक्रोसफ्टले १४ अक्टोबर २०२५ पछि विन्डोज १० लाई कुनै टेक्निकल सपोर्ट, अपडेट वा सिक्योरिटी प्याच उपलब्ध नगराउने यसअघि नै घोषणा गरिसकेको छ ।
यसको अर्थ, यस अपरेटिङ सिस्टमसँग सम्बन्धित सबै सर्भिसहरू बन्द हुनेछन्। तर डराउनु पर्दैन, किनकि एक सरल ट्रिकले तपाईंले विन्डोज १० को सिक्योरिटी अपडेट एक वर्ष थप प्राप्त गर्न सक्नुहुनेछ।
माइक्रोसफ्टले विन्डोज १० प्रयोगकर्ताहरूका लागि एक्स्टेन्डेड सिक्योरिटी अपडेट (ESU) नामक सर्भिस प्रोग्राम ल्याएको छ। यो तिनीहरूका लागि हो, जसले हाल विन्डोज ११ मा स्विच गर्न चाहँदैनन् वा जसको हार्डवेयर विन्डोज ११ सपोर्ट गर्दैन। यस प्रोग्रामबाट प्रयोगकर्तालाई केवल सिक्योरिटी अपडेट्स उपलब्ध हुनेछन्, कुनै नयाँ फीचर वा टेक्निकल सपोर्ट रहने छैन।
यो सर्भिस प्राप्त गर्न प्रयोगकर्ताले एक पटकको लागि ३० अमेरिकी डलर भुक्तानी गर्नुपर्नेछ। तर यदि तपाईंले आफ्नो पीसीको ब्याकअप लिइसक्नुभएको छ वा तपाईंसँग माइक्रोसफ्ट रिवार्ड पोइन्ट्स छन् भने, यसलाई निशुल्क प्राप्त गर्न सक्नुहुनेछ।
यदि तपाईंको डिभाइस विन्डोज ११ का लागि इनएलीजेबल छ र नयाँ ल्यापटप वा कम्प्युटर किन्न खर्च गर्न चाहनुहुन्न भने, यो ESU सर्भिस प्रोग्राम स्मार्ट विकल्प हुन सक्छ।
