स्नेहा झा
विन्डोज कम्प्युटरमा पाइने शटडाउन र रिस्टार्ट अप्सन देखिनमा उस्तै जस्तो लागे पनि, विन्डोज ८ र त्यसपछि आएका भर्जनहरूमा तिनीहरूको काम गर्ने तरिका पूरै फरक हुन्छ। शटडाउनमा फास्ट स्टार्टअपको फिचरले सिस्टमलाई आंशिक रूपमा सेभ गरेर राख्छ भने रिस्टार्टले सिस्टमलाई पूर्ण रूपमा बन्द गरी क्लिन स्टार्ट दिन्छ। सही समयमा सही अप्सन छान्नु सिस्टमको प्रदर्शन र एरर फिक्सिङका लागि अत्यन्तै महत्वपूर्ण हुन्छ।
विन्डोजमा शटडाउन भनेको के हो?
विन्डोज ८ पछि माइक्रोसफ्टले फास्ट स्टार्टअप नामको फिचर थपेको हो। धेरैलाई लाग्छ शटडाउन गर्दा सबै एप र फाइलहरू बन्द हुन्छन्, तर व्यवहारमा त्यस्तो हुँदैन। वास्तवमा कर्नेलको अवस्था हार्ड डिस्कमा सेभ हुन्छ र अर्को पटक पीसी अन गर्दा सिस्टम छिटो बुट हुन्छ। यही कारणले शटडाउन गरेपछि पनि धेरै पटक पुराना समस्याहरू बाँकी नै रहन सक्छन्।
रिस्टार्ट गर्दा के हुन्छ?
रिस्टार्ट अप्सनले सिस्टमलाई पूर्ण रूपमा बन्द गरेर फेरि सुरु गर्छ। यसका थुप्रै फाइदाहरू छन्। विन्डोज कर्नेलसहित सबै प्रोसेसहरू बन्द हुन्छन्, जसले सिस्टमलाई क्लिन बुट दिन्छ। यसले सफ्टवेयर गडबडी र सिस्टम एररहरू ठीक हुने सम्भावना बढाउँछ। तर यस प्रक्रियामा बुट हुन शटडाउनको तुलनामा अलिकति बढी समय लाग्न सक्छ।
कहिले शटडाउन र कहिले रिस्टार्ट गर्ने?
जब कम्प्युटरमा सबै काम सकिन्छ र सिस्टम सामान्य रूपमा चलिरहेको हुन्छ, त्यस्तो अवस्थामा शटडाउन गर्नु उपयुक्त हुन्छ। शटडाउनको अर्थ पीसीलाई बन्द गर्नु हो, ताकि पछि फेरि प्रयोग गर्न सकियोस्। यदि सिस्टममा कुनै समस्या छैन, कुनै नयाँ अपडेट वा सफ्टवेयर इन्स्टल गरिएको छैन र केही समयका लागि कम्प्युटर बन्द गर्नुपरेको छ भने शटडाउन पर्याप्त हुन्छ। यसले सिस्टम सुरक्षित रूपमा बन्द गर्छ र फास्ट स्टार्टअपको कारणले अर्को पटक कम्प्युटर छिटो अन पनि हुन्छ।
रिस्टार्ट भने तब गर्नुपर्छ जब सिस्टममा कुनै परिवर्तन भएको छ वा कुनै समस्या देखिन थालेको छ। जस्तै, विन्डोज अपडेट इन्स्टल गर्दा, नयाँ सफ्टवेयर वा ड्राइभर इन्स्टल गर्दा, सिस्टम फाइलहरूमा परिवर्तन हुँदा तिनलाई सही रूपमा लागू गर्न रिस्टार्ट आवश्यक हुन्छ। साथै यदि कम्प्युटर सुस्त चलिरहेको छ, बारम्बार ह्याङ्ग भइरहेको छ वा कुनै एरर समाधान भइरहेको छैन भने रिस्टार्ट गर्दा सबै प्रोसेसहरू बन्द भएर सिस्टमलाई क्लिन स्टार्ट मिल्छ। यही कारणले प्राविधिक समस्याहरू समाधान गर्न रिस्टार्टलाई सबैभन्दा प्रभावकारी उपाय मानिन्छ।
