आईसीटी समाचार
काठमाडौं । नेकपा (एमाले) का अध्यक्ष केपी शर्मा ओलीले पार्टीको नीति अध्ययन तथा अनुसन्धान प्रतिष्ठान नेपाल (इन्स्पायर) को वेबसाइट सार्वजनिक गरेका छन् । पार्टीको केन्द्रीय कार्यालय च्यासलमा आयोजित कार्यक्रममा अध्यक्ष ओलीले बिहीबार प्रतिष्ठानको वेबसाइट ‘इन्स्पायर२०८२ डट ओआरजी’ सार्वजनिक गरेका हुन् ।
प्रतिष्ठानका अध्यक्ष विष्णु रिमालका अनुसार इन्स्पायरले नेपालका राजनीतिक, आर्थिक, सामाजिक, सांस्कृतिक, प्रविधिगत तथा भूराजनीतिक चुनौतीबारे अध्ययन र अनुसन्धान गर्दै आएको छ ।
प्रतिष्ठानले नीतिनिर्माता र विषयविज्ञलाई एकै ठाउँमा ल्याएर विभिन्न विषयमा छलफल तथा नीतिगत बहससमेत सञ्चालन गर्दै आएको उनले बताए । ज्ञान उत्पादन र रणनीतिक बहसलाई सहजीकरण गर्दै नेपालको लोकतान्त्रिक, समाजवादोन्मुख तथा राष्ट्रिय विकासको एजेन्डामा योगदान पुर्याउने लक्ष्य प्रतिष्ठानले राखेको छ ।
वेबसाइटमा अर्थराजनीति, समाज अध्ययन, प्राकृतिक स्रोत, प्रविधि तथा नवप्रवर्तन र परराष्ट्र मामिलासम्बन्धी सामग्री समावेश गरिएको छ । यसअघि प्रतिष्ठानले आयोजना गरेका नीतिगत बहसका कार्यपत्र तथा जर्नलमा प्रकाशित आलेख पनि वेबसाइटमा राखिएका छन् ।
वेबसाइटमा आठ वटा कार्यपत्र र चारवटा विशेष प्रतिवेदन समावेश छन् । प्रतिष्ठानका कार्यकारी निर्देशक आशिष रेग्मीका अनुसार वेबसाइटमा प्रकाशित सामाग्रीमाथि नीतिगत बहस गरी त्यसबाट प्राप्त नयाँ विचार समेत समावेश गरिनेछ ।
