आईसीटी समाचार
अमेरिकामा टिकटक ‘बचाउने’ योजना अन्ततः स्पष्ट हुँदै गएको छ। मंगलबार द वाल स्ट्रीट जर्नलले यसबारे थप विवरण सार्वजनिक गर्दै अमेरिका र चिनियाँ पक्षबीचको सम्झौताका विशेष प्रावधानहरू अन्तिम चरणमा पुगेको जानकारी दिएको छ।
प्रतिवेदन अनुसार, टिकटकको अमेरिकी व्यवसायको ८० प्रतिशत स्वामित्व अमेरिकी लगानीकर्ताहरूले लिनेछन्। यस समूहमा टिकटकको दीर्घकालीन साझेदार ओरेकल, सिलिकन भ्यालीको भेन्चर क्यापिटल कम्पनी अन्ड्रेसन होरोविट्ज र प्राइभेट इक्विटी कम्पनी सिल्भर लेकसमेत रहनेछन्।
चिनियाँ लगानीकर्ताको स्वामित्व कानुनी सीमा अनुसार २० प्रतिशतभन्दा कम हुने बताइएको छ। अमेरिकी सरकारले पनि उक्त ‘अमेरिकी-प्रभुत्व भएको’ बोर्डमा एक सदस्य चयन गर्ने अधिकार पाउनेछ।
यस्तो सम्भावित व्यवस्था केही महिनादेखि चर्चामा रहेको थियो। अमेरिकी राष्ट्रपति डोनाल्ड ट्रम्पले गत जुनमै सम्झौता दुई साताभित्र टुंगिने बताएका थिए। पछिल्लो समय चिनियाँ नियामक निकायले अमेरिकी संस्करणको टिकटकले उही चिनियाँ एल्गोरिदम प्रयोग गर्ने अनुमति दिएको जानकारी सार्वजनिक भएको छ।
तर, वाल स्ट्रीट जर्नलका अनुसार, टिकटक इन्जिनियरहरूले बाइटडान्सबाट प्राविधिक इजाजत लिएर नयाँ एल्गोरिदमसहितको ‘नयाँ टिकटक’ एप बनाउने तयारी गरेका छन्। कम्पनीले अहिले नयाँ एप परीक्षण गरिरहेको बताइएको छ। यसबीच, अमेरिकी प्रयोगकर्ताको डाटा सुरक्षाको जिम्मेवारी ओरेकलले लिनेछ। टिकटक र ओरेकलबीच यसअघि पनि डाटा सुरक्षा सम्बन्धी वार्ता हुँदै आएको छ।
यद्यपि अन्तिम सम्झौता नजिक देखिए पनि यसलाई औपचारिक बनाउन केही समय लाग्न सक्ने अनुमान गरिएको छ। यसबीच राष्ट्रपति ट्रम्पले टिकटकमाथि लाग्ने प्रतिबन्धको समयसीमा चौथो पटक थपेका छन्। मंगलबार उनले ह्वाइट हाउसमा पत्रकारसँग भनेका थिए - शुक्रबार चिनियाँ राष्ट्रपति सी जिनपिङसँग प्रत्यक्ष कुरा गरेर सबै कुरा पुष्टि गर्नेछन्।
