आईसीटी समाचार
काठमाडौं । गुगलले आफ्नो एआई च्याटबट जेमिनीमा मोडल प्रयोगसम्बन्धी व्यवस्था परिवर्तन गर्ने भएको छ । अक्टोबर ९ देखि नि:शुल्क खाता प्रयोग गर्नेहरूले जेमिनी फ्ल्यास र प्रो मोडलको विकल्प प्रयोग गर्न नपाउने भएका छन् । यससँगै नि:शुल्क प्रयोगकर्ताका अनुरोधहरू गुगलको कम खर्चिलो एआई मोडल फ्ल्यास–लाइटमार्फत प्रशोधन गरिनेछ ।
गुगलले आफ्नो सपोर्ट पेजमार्फत जेमिनी एप र वेबसाइटमा गरिने परिवर्तनबारे जानकारी दिएको हो । नयाँ व्यवस्थाले सशुल्क सदस्यता नलिएका प्रयोगकर्ताले जेमिनी प्रयोग गर्दा उपलब्ध हुने सुविधा र मोडल छनोटमा असर पार्नेछ ।
हाल जेमिनी एपको माथिल्लो भागमा रहेको ड्रपडाउन मेनु वा डेस्कटप संस्करणमा टेक्स्ट बक्सको छेउबाट विभिन्न मोडल छनोट गर्न सकिन्छ । तर परिवर्तन लागू भएपछि निःशुल्क प्रयोगकर्ताका लागि सबै अनुरोधमा फ्ल्यास–लाइट मोडल प्रयोग हुनेछ ।
फ्ल्यास–लाइट तुलनात्मक रूपमा कम खर्चिलो मोडल हो । फ्ल्यासले यसभन्दा बढी क्षमता प्रदान गर्छ भने प्रो मोडल जटिल तर्क, गणितीय समस्या र कठिन कार्यहरू समाधान गर्न लक्षित छ ।
प्रविधिसम्बन्धी वेबसाइट इन्ग्याजेटका अनुसार गुगल एआई प्लस सदस्यता लिएका प्रयोगकर्ताले समेत जेमिनी ३.१ प्रो मोडलमा पहुँच गुमाउनेछन् । अमेरिकामा मासिक ५ डलर शुल्क लाग्ने गुगल एआई प्लस कम्पनीको सबैभन्दा सस्तो सदस्यता योजना हो ।
गुगलका अनुसार प्रो मोडलले जटिल गणितीय समस्या र कोडिङसम्बन्धी प्रश्न समाधान गर्न राम्रो प्रदर्शन गर्छ । साथै, टेक्स्ट, फाइल, तस्बिर र भिडियो बुझ्ने क्षमतामा पनि यो अन्य मोडलभन्दा सक्षम छ ।
यस परिवर्तनले विशेषगरी कोडिङ, अध्ययन तथा विभिन्न कागजातको विश्लेषणका लागि जेमिनी प्रयोग गर्नेहरूलाई असर पार्न सक्छ । धेरै फाइल तथा सामग्री बुझाएर विस्तृत विश्लेषण गराउन चाहने प्रयोगकर्ताले प्रो मोडलको पहुँचका लागि महँगो सदस्यता लिनुपर्ने हुन सक्छ ।
गुगल एआई प्रो योजनाको शुल्क मासिक २० डलर छ । त्यस्तै, बढी प्रयोग सीमा र थप सुविधा चाहने प्रयोगकर्ताका लागि उपलब्ध एआई अल्ट्रा योजनाको शुल्क कम्तीमा मासिक १०० डलर पर्छ ।
मोडलको क्षमता छनोट गर्न सकिने
गुगलले मोडल प्रयोगको अनुभव थप व्यवस्थित बनाउन प्रत्येक मोडलमा ‘एफर्ट लेबल’ अर्थात् कार्यसम्पादन प्रयासको स्तर छनोट गर्ने विकल्प पनि थप्दैछ । यसअन्तर्गत प्रयोगकर्ताले कम, मध्यम र उच्चमध्ये आफूलाई आवश्यक स्तर रोज्न सक्नेछन् ।
छनोट गरिएको स्तरले कुनै काम पूरा गर्न मोडलले गर्ने प्रयास र त्यसअनुसारको क्षमतालाई निर्धारण गर्नेछ । उच्च स्तरमा मोडलले बढी विस्तृत रूपमा काम गर्न सक्ने भए पनि त्यसले प्रयोगको उपलब्ध सीमाबाट बढी हिस्सा खर्च गर्नेछ ।
यसका अतिरिक्त, एआई अल्ट्रा सदस्यता लिएका प्रयोगकर्ताले जेमिनीको अधिकतम क्षमता प्रयोग गर्नुपर्ने अवस्थामा ‘डीप थिङ्क’ विकल्प पनि पाउनेछन् ।
जेमिनी ४ आर्गनमा पनि पहुँच दिइने
गुगलले एआई अल्ट्रा सदस्यहरूलाई जेमिनी ४ आर्गन सार्वजनिक रूपमा उपलब्ध भएपछि त्यसमा पहुँच दिने जनाएको छ । हाल भने यो मोडल गुगलको ‘फेयरविण्ड’ कार्यक्रमअन्तर्गत सरकार तथा विश्वसनीय साझेदारहरूका लागि मात्र उपलब्ध रहेको छ ।
यी परिवर्तनले जेमिनी प्रयोगकर्तालाई उपलब्ध हुने एआई मोडलहरू सदस्यता योजनाअनुसार थप सीमित बनाउने देखिन्छ । विशेष गरी जटिल कामका लागि शक्तिशाली मोडल प्रयोग गर्न चाहने नि:शुल्क प्रयोगकर्ताले अब उपलब्ध विकल्प र सशुल्क योजनाबीच छनोट गर्नुपर्ने हुन सक्छ ।
