आईसीटी समाचार
काठमाडौं । नयाँ सवारी चालक अनुमतिपत्र प्रणालीको सर्भरमा प्राविधिक समस्या उत्पन्न भएपछि यातायात व्यवस्था कार्यालयको सेवा प्रवाह अवरुद्ध भएको छ ।
यातायात व्यवस्था कार्यालयले आज एक अत्यन्त जरुरी सूचना जारी गर्दै नयाँ सर्भरमा समस्या देखिएकाले सेवा सञ्चालन गर्न नसकिएको जनाएको छ ।
कार्यालयका अनुसार सर्भरको समस्या समाधान हुना साथ अवरुद्ध सेवा पुनः सञ्चालन गरिनेछ । सेवा कहिलेदेखि नियमित हुन्छ भन्नेबारे भने सूचनामा स्पष्ट समय उल्लेख गरिएको छैन ।
सर्भरमा समस्या आएपछि सेवा लिन पुगेका सेवाग्राही प्रभावित भएका छन् । कार्यालयले सेवा अवरुद्ध हुँदा सेवाग्राहीमा पर्न गएको असुविधाप्रति क्षमायाचना गर्दै समस्या समाधानका लागि सहकार्य र धैर्यता अपनाउन आग्रह गरेको छ ।
नयाँ प्रणालीमा देखिएको प्राविधिक समस्या समाधान भएपछि सेवा पुनः नियमित हुने कार्यालयले जनाएको छ ।
