आईसीटी समाचार
काठमाडौं । त्रिभुवन विश्वविद्यालय, विज्ञान तथा प्रविधि अध्ययन संस्थानले २०८३ सालका लागि सञ्चालन गरेको स्नातक तहको सूचना प्रविधि (बीआईटी) प्रवेश परीक्षाको नतिजा परीक्षा सम्पन्न भएको ११ घण्टामै सार्वजनिक गरेको छ ।
संस्थानका अनुसार बीआईटीका देशभरका ७५६ सिटका लागि ३ हजार ५८१ विद्यार्थीले आवेदन दिएका थिए । तीमध्ये ३ हजार २२३ जना प्रवेश परीक्षामा सहभागी भएका थिए ।
ओएमआर प्रणालीबाट लिइएको प्रवेश परीक्षा देशभरका १४ वटा परीक्षा केन्द्रमा सञ्चालन गरिएको थियो । परीक्षा एकै दिन सम्पन्न गरी सोही दिन नतिजा सार्वजनिक गरिएको विज्ञान तथा प्रविधि अध्ययन संस्थानका डीन प्रा. डा. शंकरप्रसाद खनालले जानकारी दिए ।
बीआईटी कार्यक्रम त्रिभुवन विश्वविद्यालयका १५ वटा आंगिक क्याम्पसमा सञ्चालन हुँदै आएको छ । काठमाडौं उपत्यकाका चार क्याम्पसमध्ये पाटन संयुक्त क्याम्पसमा १०८, भक्तपुर बहुमुखी क्याम्पसमा १०८, अमृत क्याम्पसमा ७२ र पद्मकन्या क्याम्पसमा ७२ सिट निर्धारण गरिएको छ ।
यसअघि विज्ञान तथा प्रविधि अध्ययन संस्थानले २०८३ साउन २४ गते सञ्चालन गरेको स्नातक तह कम्प्युटर विज्ञान तथा सूचना प्रविधि (बीएससी सीएसआईटी) प्रवेश परीक्षाको नतिजा समेत सोही दिन सार्वजनिक गरेको थियो । उक्त परीक्षामा ८ हजार २६ विद्यार्थी सहभागी भएका थिए ।
कर्णाली प्रदेशमा संस्थानअन्तर्गतका शैक्षिक कार्यक्रम सञ्चालनमा नरहे पनि त्यहाँका विद्यार्थीलाई प्रवेश परीक्षामा सहज बनाउन सुर्खेतमा परीक्षा केन्द्र तोकिएको थियो । यसले कर्णालीका विद्यार्थीलाई परीक्षा दिन सहज भएको संस्थानका सहायक डीन डा. कोमलराज रिजालले बताए ।
