आईसीटी समाचार
काठमाडौं । शिक्षा तथा खेलकुद मन्त्रालयले वर्तमान सरकार गठनपछि पहिलो १०० दिनमा सम्पन्न भएका प्रमुख कामहरूको विवरण सार्वजनिक गरेको छ । मन्त्रालयले यस अवधिमा शिक्षा सेवा प्रवाहलाई प्रभावकारी बनाउने, नीतिगत सुधारलाई गति दिने तथा खेलकुद क्षेत्रको विकासलाई प्राथमिकतामा राखेर विभिन्न कार्यक्रम कार्यान्वयन गरिएको जनाएको छ ।
मन्त्रालयका अनुसार शैक्षिक सुधारअन्तर्गत माध्यमिक शिक्षा परीक्षा (एसईई) सहित विभिन्न परीक्षाको नतिजा निर्धारित समयभित्र सार्वजनिक गर्ने अभ्यास सुरु गरिएको छ । त्यस्तै, वैदेशिक अध्ययन अनुमति (नो अब्जेक्सन सर्टिफिकेट–एनओसी) प्रणालीलाई थप सहज बनाउन अनलाइन सेवा तथा अन्तर–आबद्धता प्रणालीमा सुधार गरिएको छ । कक्षा ५ सम्म निरन्तर मूल्याङ्कन प्रणाली कार्यान्वयन गर्ने प्रक्रिया पनि अघि बढाइएको मन्त्रालयले जनाएको छ ।
उच्च शिक्षातर्फ विश्वविद्यालयहरूमा हुने दलीय हस्तक्षेप न्यूनीकरणका लागि पहल गरिएको छ भने विपद्बाट प्रभावित विद्यालयहरूको पुनर्निर्माणलाई पनि प्राथमिकतामा राखिएको छ । साथै, प्राविधिक तथा व्यावसायिक शिक्षामार्फत लक्षित समुदायलाई रोजगारीमुखी सीप विकास तालिम प्रदान गर्ने कार्यक्रम सञ्चालन गरिएको छ ।
खेलकुद क्षेत्रतर्फ राष्ट्रियस्तरका प्रतियोगिताहरू आयोजना गरिएको, खेलाडीहरूको स्वास्थ्य उपचारका लागि आवश्यक सम्झौता सम्पन्न गरिएको तथा विभिन्न अन्तर्राष्ट्रिय प्रतियोगितामा नेपाली खेलाडीहरूको सहभागिता सुनिश्चित गरिएको मन्त्रालयले उल्लेख गरेको छ ।
मन्त्रालयका अनुसार पछिल्ला १०० दिनमा गरिएका यी पहलले सेवा प्रवाहलाई थप प्रभावकारी बनाउन, प्रशासनिक प्रक्रियालाई सरल बनाउन तथा शिक्षा क्षेत्रमा देखिएका केही नीतिगत चुनौती समाधान गर्न सहयोग पुगेको छ । आगामी दिनमा पनि यस्ता नीतिगत तथा संरचनागत सुधारलाई निरन्तरता दिँदै अझ व्यवस्थित रूपमा कार्यान्वयन गरिने मन्त्रालयको योजना रहेको जनाएको छ ।
