नयाँ आईफोन बेच्न एप्पलले पुराना डिभाइस स्लो बनाएको दाबी

काठमाडौं । यदि तपाईं लामो समयदेखि आईफोन प्रयोग गर्दै आउनुभएको छ भने, सन् २०१७ को चर्चित ‘ब्याटरीगेट’ विवाद तपाईंलाई अवश्य याद होला । त्यतिबेला एप्पलमाथि पुराना आईफोन मोडेलहरूलाई जानाजानी स्लो बनाएको आरोप लागेको थियो, जसले विश्वभर ठूलो विवाद सिर्जना गरेको थियो । पछि एप्पलले केही पुराना आईफोनहरूको परफर्मेन्स सफ्टवेयर अपडेटमार्फत सीमित गरिएको स्वीकार पनि गरेको थियो ।

कम्पनीले त्यसबेला सफाइ दिँदै कमजोर भइसकेको ब्याट्री भएका फोनहरू अचानक बन्द हुन नदिन यस्तो कदम चालिएको बताएको थियो । तर अहिले फेरि त्यस्तै प्रकृतिको नयाँ विवाद सोशल मिडियामा तीव्र रूपमा चर्चामा आएको छ । यस पटक एप्पलकी पूर्व सफ्टवेयर इन्जिनियर बताइएकी एक महिलाले कम्पनीमाथि गम्भीर आरोप लगाएकी छन् ।

के एप्पलले फेरि पुराना आईफोन स्लो बनायो ?

हाल इन्टरनेटमा एउटा भिडियो भाइरल भइरहेको छ, जसमा आफूलाई एप्पलकी पूर्व सफ्टवेयर इन्जिनियर बताउने महिलाले कम्पनीविरुद्ध सनसनीपूर्ण दाबी गरेकी छन् । भिडियो सार्वजनिक भएपछि सोशल मिडियामा व्यापक बहस सुरु भएको छ । धेरै प्रयोगकर्ताहरूले प्रश्न उठाइरहेका छन्- के एप्पलले पुराना आईफोन प्रयोगकर्तालाई नयाँ मोडेल किन्न बाध्य पारिरहेको छ ?

भिडियोमा महिलाले दाबी गरेकी छन् कि एप्पलले हरेक नयाँ आईफोन सार्वजनिक गर्दा पुराना डिभाइसहरूका लागि विशेष सफ्टवेयर अपडेट पठाउने गर्थ्यो । उनका अनुसार ती अपडेटमा लुकेका कोडहरू समावेश हुन्थे, जसले पुराना आईफोनहरूको स्पीड घटाउने र विभिन्न समस्या उत्पन्न गराउने काम गर्थे। यसको उद्देश्य प्रयोगकर्तालाई नयाँ आईफोनतर्फ आकर्षित गर्नु रहेको उनको आरोप छ ।

यो भिडियो एक्समा ‘वाल स्ट्रिट एप्स’ नामको अकाउन्टबाट शेयर गरिएको हो । भिडियोमा महिलाले भनिन्:

“म एप्पलमा सफ्टवेयर इन्जिनियर थिए । हरेक नयाँ आईफोन लन्चसँगै पुराना फोनहरूमा यस्तो सिस्टम हालिन्थ्यो, जसले ती डिभाइसहरूलाई बिस्तारै स्लो बनाउँथ्यो । मानिसहरूलाई आफ्नो फोन बिग्रँदै गएको जस्तो लाग्थ्यो, तर यो सबै जानाजानी गरिएको थियो ।”

म्याकअब्जर्भरको रिपोर्टअनुसार महिलाले एप्पलले रोल आउट गर्ने अपडेटहरूमा ‘हिडन कोड’ प्रयोग हुने दाबी गरेकी छन् । ती कोडहरूले पुराना डिभाइसको परफर्मेन्समा असर पार्ने र प्रयोगकर्तालाई नयाँ फोन खरिद गर्न प्रेरित गर्ने उद्देश्य राखिएको उनको भनाइ छ ।

हालसम्म एप्पलले भाइरल भिडियोमा गरिएको दाबीबारे कुनै आधिकारिक प्रतिक्रिया दिएको छैन । त्यसैले महिलाले लगाएका आरोप कति सत्य हुन् भन्ने कुरा पुष्टि भइसकेको छैन ।

यस्तै, जागरणले पनि भिडियोमा गरिएका दाबीहरूको स्वतन्त्र पुष्टि नगरेको जनाएको छ । त्यसैले अहिले सोशल मिडियामा भइरहेको चर्चा र आरोपहरूलाई सावधानीपूर्वक हेर्न आवश्यक छ ।

•