आईसीटी समाचार
काठमाडौं । सरकारले सवारी चालक अनुमतिपत्र (ड्राइभिङ लाइसेन्स) छपाइ तथा वितरण प्रक्रियालाई व्यवस्थित र छिटो बनाउन नयाँ विद्युतीय प्रणाली ईडीएलभीआरएस (EDLVRS) कार्यान्वयनमा ल्याएको छ ।
पूर्वाधार विकास मन्त्रालयअन्तर्गतको यातायात व्यवस्था विभागले लामो समयदेखि देखिँदै आएको लाइसेन्स छपाइ तथा वितरणमा हुने ढिलाइ कम गर्न नयाँ प्रणाली सुरु गरेको हो ।
नयाँ प्रणालीअन्तर्गत पहिलो चरणमा मधेश प्रदेशका ३ हजार ८१ वटा सवारी चालक अनुमतिपत्र छपाइ गरिएको विभागले जनाएको छ । छपाइ सम्पन्न भएका लाइसेन्स सम्बन्धित सेवाग्राहीलाई वितरणका लागि हुलाकमार्फत यातायात व्यवस्था सेवा कार्यालयमा पठाइएको छ ।
ईडीएलभीआरएसमा सेवाग्राहीको विवरण विद्युतीय रूपमा प्रविष्ट भएपछि उक्त विवरण सिधै सुरक्षण मुद्रणमा पुग्ने व्यवस्था गरिएको छ । प्रणालीमा प्राप्त विवरणका आधारमा सुरक्षण मुद्रणले लाइसेन्स छपाइ गरी हुलाकमार्फत सम्बन्धित यातायात व्यवस्था सेवा कार्यालयमा पठाउनेछ ।
विभागका अनुसार नयाँ प्रणालीले लाइसेन्स छपाइदेखि सम्बन्धित कार्यालयमा पठाउनेसम्मको प्रक्रियालाई थप व्यवस्थित बनाउनेछ । यसबाट नयाँ लाइसेन्स लिनेदेखि पुरानो लाइसेन्स नवीकरण गर्ने सेवाग्राहीले समेत छिटो सेवा पाउने अपेक्षा गरिएको छ ।
यसअघि लाइसेन्स छपाइ तथा वितरणमा लामो समय लाग्दा सेवाग्राहीले महिनौँसम्म प्रतीक्षा गर्नुपर्ने अवस्था रहँदै आएको थियो । नयाँ प्रणाली कार्यान्वयनसँगै छपाइ र वितरणमा देखिँदै आएको ढिलाइ घट्ने तथा सेवा प्रवाह थप प्रभावकारी हुने विभागको विश्वास छ ।
