नेपाल इन्जिनियरिङ कलेजका विद्यार्थीद्वारा नेपाल इको प्यानल उद्योगको शैक्षिक अवलोकन

भक्तपुर । नेपाल इन्जिनियरिङ कलेज (NEC), चाँगुनारायण, भक्तपुरमा अध्ययनरत सिभिल इन्जिनियरिङ स्नातक (Bachelor in Civil Engineering) दोस्रो सेमेस्टरका १४४ जना विद्यार्थीले शैक्षिक भ्रमणअन्तर्गत ISO प्रमाणित नेपाल इको प्यानल उद्योगको अवलोकन गरेका छन् ।

सिभिल इन्जिनियरिङ सामाग्री (Civil Engineering Materials) विषयको पाठ्यक्रमअनुसार आयोजना गरिएको भ्रमणमा विद्यार्थीहरूलाई ७२–७२ जनाको दुई समूहमा विभाजन गरी उद्योगको अवलोकन गराइएको थियो ।

भ्रमणका क्रममा विद्यार्थीहरूले EPS–सिमेन्ट आधारित हलुका स्यान्डविच प्यानलको संरचना, उत्पादन प्रक्रिया, गुणस्तरीय निर्माण विधि, प्रमुख विशेषताहरू, इन्जिनियरिङ गुणहरू तथा भवन निर्माणमा यसको प्रयोगबारे प्रत्यक्ष जानकारी प्राप्त गरेका थिए । 

साथै, आधुनिक निर्माण प्रविधिमा यस्ता प्रिफ्याब्रिकेटेड प्यानलको महत्व, ताप तथा ध्वनि इन्सुलेसन क्षमता, भूकम्पीय दृष्टिले उपयुक्तता, अग्नि प्रतिरोधात्मक गुण तथा दिगो निर्माणमा यसको योगदानका विषयमा समेत जानकारी दिइएको थियो ।

यस शैक्षिक भ्रमणले विद्यार्थीहरूलाई कक्षाकोठामा प्राप्त सैद्धान्तिक ज्ञानलाई उद्योगमा भइरहेको वास्तविक उत्पादन प्रक्रियासँग जोड्ने अवसर प्रदान गरेको थियो । उद्योगका प्राविधिकहरूसँगको अन्तरक्रियाबाट विद्यार्थीहरूले आधुनिक निर्माण सामाग्री तथा प्रिफ्याब्रिकेटेड निर्माण प्रणालीबारे थप व्यावहारिक ज्ञान हासिल गरेका थिए ।

कार्यक्रमको सहजीकरण इन्जिनियर कृष्ण सुन्दर कुम्पाखाले गर्नुभएको थियो । उहाँले आधुनिक, वातावरणमैत्री तथा दिगो निर्माण प्रविधिको प्रयोगलाई प्रवर्द्धन गर्दै भावी सिभिल इन्जिनियरहरूलाई नवीन निर्माण सामाग्रीबारे व्यवहारिक ज्ञान प्रदान गर्नु आवश्यक रहेको बताउनुभयो ।

नेपाल इको प्यानलले समय–समयमा विभिन्न शैक्षिक संस्थाका विद्यार्थीहरूका लागि यस्ता औद्योगिक तथा शैक्षिक अवलोकन कार्यक्रम सञ्चालन गर्दै आधुनिक तथा दिगो निर्माण प्रविधि प्रति जनचेतना अभिवृद्धि गर्दै आएको छ ।