आईसीटी समाचार
राष्ट्रको समृद्धिका लागि तथ्याङ्कको महत्त्वलाई मध्यनजर गर्दै आजदेखि देशव्यापी रूपमा दोस्रो आर्थिक गणना सुरु भएको छ। ‘तथ्याङ्क नै राष्ट्रको समृद्धि’ भन्ने मूल नाराका साथ सञ्चालन हुने यो गणनाले देशको आर्थिक परिदृश्यको यथार्थ तस्वीर प्रस्तुत गर्ने अपेक्षा गरिएको छ।
प्राप्त जानकारीअनुसार गणना कार्यका लागि देशभरका विभिन्न क्षेत्रमा गणक तथा सुपरीवेक्षकहरू खटिसकेका छन्। करिब पाँच हजार जनशक्ति परिचालन गरिएको छ, जसले स्थलगत रूपमा तथ्याङ्क सङ्कलन गर्नेछन्।
कार्यतालिकाअनुसार स्थलगत तथ्याङ्क सङ्कलन आजदेखि सुरु भई असारको पहिलो सातासम्म जारी रहनेछ। यस गणनाबाट प्राप्त विवरणले योजना निर्माण र नीतिगत निर्णयमा कोसेढुङ्गाको काम गर्ने आयोजकको भनाइ छ।
