आईसीटी समाचार
काठमाडौं । गुगलले सफ्टवेयरका सुरक्षा कमजोरी पहिचान गर्न, तिनको परीक्षण गर्न र समाधान विकास गर्न विशेष क्षमता भएको नयाँ कृत्रिम बुद्धिमत्ता (एआई) मोडल ‘जेमिनाइ ४ कार्बन’ सार्वजनिक गरेको छ । कम्पनीका अनुसार यो मोडल जटिल सफ्टवेयर इन्जिनियरिङका काम र साइबर सुरक्षा परीक्षणमा केन्द्रित छ ।
गुगलको ब्लग पोस्टअनुसार कार्बनले आर्टिफिसियल एनालाइसिस इन्टेलिजेन्स इन्डेक्समा ५९ अंक प्राप्त गर्दै पहिलो स्थान हासिल गरेको छ । यसको क्षमता र सुरक्षाको थप मूल्यांकन गर्न सुरुमा सीमित संख्यामा साइबर सुरक्षा विज्ञ तथा संस्थालाई मात्र पहुँच दिने कम्पनीको योजना छ । त्यसपछि ‘फेयरविन्ड प्रोग्राम’ अन्तर्गत विश्वसनीय साझेदारलाई पनि मोडल उपलब्ध गराइनेछ ।
गुगलका प्रमुख कार्यकारी अधिकृत सुन्दर पिचाईले सामाजिक सञ्जाल एक्समार्फत नयाँ मोडल सार्वजनिक भएको जानकारी दिएका छन् । गुगलले आफ्ना एआई मोडल नियमित रूपमा सार्वजनिक गर्ने योजनाअनुसार जेमिनाइ ४ कार्बन ल्याइएको उनले बताएका छन् ।
जेमिनाइ ४ आर्गन सार्वजनिक भएको दुई सातापछि आएको कार्बनलाई लामो समयसम्म चल्ने र जटिल इन्जिनियरिङ कार्य पूरा गर्न सक्षम बनाइएको गुगल डीपमाइन्डले जनाएको छ । यसले ठूला सफ्टवेयर कोड संरचना तथा कम्प्युटर प्रणालीको तल्लो तहमा रहेका त्रुटिको मूल कारण पहिचान गर्नुका साथै तिनको समाधान विकास गर्न सक्छ ।
सुरक्षा कमजोरी पहिचानमा ८८.२ प्रतिशत सफलता
गुगलका अनुसार सफ्टवेयरको सुरक्षा कमजोरी पहिचान गर्ने क्षमता मापन गर्ने एसईसी–बेन्च प्रो परीक्षणमा कार्बनले ८८.२ प्रतिशत सफलता हासिल गरेको छ । त्यस्तै, सुरक्षा कमजोरीको दुरुपयोग गर्न सम्भव छ वा छैन भन्ने परीक्षण गर्ने एक्सप्लोइटजिममा ५४.८ प्रतिशत र कमजोरी समाधान गर्ने क्षमता मापन गर्ने सीडब्ल्यूई-बेन्चमा ७१ प्रतिशत अंक प्राप्त गरेको कम्पनीले जनाएको छ ।
गुगलको आन्तरिक परीक्षणमा सुरक्षित कोड निर्माण गर्ने क्षमतामा कार्बनले अघिल्लो मोडल आर्गनको तुलनामा दोब्बरभन्दा बढी सफलता हासिल गरेको दाबी गरिएको छ । त्यस्तै, गुगलको क्रोम टोलीका अनुसार उच्च गुणस्तरका सफ्टवेयर सुधारसम्बन्धी कोड तयार गर्ने परीक्षणमा कार्बनले अर्को एआई प्रयोगशालाको अग्रणी मोडलभन्दा १० गुणाभन्दा बढी राम्रो प्रदर्शन गरेको छ ।
सुरक्षा र विश्वसनीयतामा पनि सुधारको दाबी
एआई मोडलको क्षमता विस्तारसँगै त्यसको विश्वसनीयता र सुरक्षालाई पनि प्राथमिकता दिइएको गुगलले जनाएको छ । कम्पनीको आन्तरिक परीक्षणमा आर्गनको तुलनामा प्रमाणविहीन दाबी करिब ५० प्रतिशतले घटेको छ । त्यसैगरी, कोडिङ वातावरणमा गम्भीर सुरक्षा तथा व्यवहारगत जोखिमसम्बन्धी चेतावनी झन्डै ८० प्रतिशतले कम भएको गुगलको दाबी छ ।
टर्मिनल–बेन्च ४.० परीक्षणमा अनुचित तरिकाले सफलता हासिल गर्ने दर शून्यमा झरेको र त्यस्तो प्रयासको दर ०.४ प्रतिशतमा सीमित भएको कम्पनीले जनाएको छ । त्यस्तै, ग्रे स्वानको अप्रत्यक्ष प्रम्प्ट इन्जेक्सन परीक्षणमा मूल्यांकन गरिएका परीक्षणहरूमा आक्रमण सफल हुने दर शून्य प्रतिशत रहेको गुगलको दाबी छ ।
यी नतिजाले कार्बनलाई सुरक्षा परीक्षण र सफ्टवेयर विकासमा उपयोगी बनाउन खोजिएको देखाए पनि कम्पनीले सार्वजनिक गरेका परीक्षण नतिजा र आन्तरिक मूल्यांकनका आधारमा यसको वास्तविक कार्यसम्पादनलाई थप परीक्षणबाट पुष्टि गर्नुपर्ने हुन्छ ।
सुरुमा सीमित पहुँच, पछि सर्वसाधारणका लागि विस्तार
गुगलले जेमिनाइ ४ कार्बनलाई पहिलो चरणमा सीमित साइबर सुरक्षा विज्ञ र विश्वसनीय साझेदारलाई उपलब्ध गराउनेछ । उनीहरूबाट प्राप्त प्रतिक्रिया र परीक्षणका नतिजाका आधारमा सुरक्षा व्यवस्था थप सुदृढ गर्दै क्रमश: डेभलपर, व्यावसायिक संस्था र सर्वसाधारणसम्म पहुँच विस्तार गर्ने कम्पनीको योजना छ ।
नयाँ मोडलको प्रारम्भिक मूल्य जेमिनाइ ४ आर्गनकै बराबर निर्धारण गरिएको छ । प्रति १० लाख इनपुट टोकनको मूल्य २ अमेरिकी डलर र प्रति १० लाख आउटपुट टोकनको मूल्य १० अमेरिकी डलर तोकिएको छ । क्यास गरिएका इनपुट टोकनमा भने ९५ प्रतिशत छुट उपलब्ध गराइने कम्पनीले जनाएको छ ।
गुगलले मोडलको क्षमता, विश्वसनीयता र सुरक्षा परीक्षणलाई निरन्तरता दिँदै चरणबद्ध रूपमा पहुँच विस्तार गर्ने जनाएको छ ।
