आईसीटी समाचार
काठमाडौं । सडकमा देखिएका खाल्डाखुल्डी, क्षति तथा अन्य समस्याबारे सर्वसाधारणले तत्काल जानकारी गराउन सक्ने गरी सडक डिभिजन काठमाडौंले ‘सडक सुझाव’ नामक मोबाइल एप सञ्चालनमा ल्याएको छ ।
एपमार्फत सडकको अवस्था, पानी जम्ने समस्या, ट्राफिक सुरक्षासँग सम्बन्धित जोखिम तथा सडक निर्माणका क्रममा देखिएका समस्या समेत फोटोसहित सम्बन्धित निकायमा पठाउन सकिने व्यवस्था गरिएको छ ।
एपमा समस्या रिपोर्ट गर्दा प्रयोगकर्ताले फोटो, समस्याको प्रकृति, गम्भीरताको स्तर तथा नजिकको चिनारी स्थान उल्लेख गर्नुपर्नेछ । प्रयोगकर्ताले खिचेको तस्बिरका आधारमा समस्याको स्थान जीआईएस म्यापिङमार्फत पहिचान हुने व्यवस्था गरिएको छ । आवश्यक परे ठेगाना खोजेर स्थान निर्धारण गर्ने सुविधा पनि एपमा राखिएको छ ।
रिपोर्ट पठाइसकेपछि प्रयोगकर्ताले एउटा रिफरेन्स नम्बर प्राप्त गर्नेछन् । उक्त नम्बरमार्फत आफूले पठाएको गुनासो वा सूचनाको अवस्था एपबाटै हेर्न सकिने डिभिजनले जनाएको छ ।
प्राप्त विवरणलाई समस्याको प्रकृति, गम्भीरता र प्राथमिकताका आधारमा मूल्याङ्कन गरी आवश्यक मर्मत तथा व्यवस्थापनको प्रक्रिया अघि बढाइनेछ । यसबाट सडकमा देखिएका समस्या पहिचानदेखि समाधानको अवस्थासम्मलाई व्यवस्थित रूपमा अभिलेख गर्न सहयोग पुग्ने अपेक्षा गरिएको छ ।
‘सडक सुझाव’ एप प्ले स्टोर तथा एप स्टोरबाट डाउनलोड गर्न सकिनेछ । प्रयोगकर्ताले एप खोलेर ‘रिपोर्ट अ प्रब्लम’ विकल्पमार्फत समस्याको फोटो तथा आवश्यक विवरण पठाउन सक्नेछन् ।
सडक डिभिजनले आगामी दिनमा भक्तपुर र ललितपुरका सडकसम्बन्धी विवरणलाई समेत यही प्रणालीमा जोड्ने तयारी गरेको जनाएको छ । डिभिजनले सडकसम्बन्धी समस्या छिटो पहिचान र समाधान गर्न प्रविधिको प्रयोगलाई थप विस्तार गर्ने जनाएको छ ।
