आईसीटी समाचार
काठमाडौं । दक्षिण एसियाको इन्टरनेट पूर्वाधार, नेटवर्क सञ्चालन तथा प्राविधिक सहकार्यलाई थप सुदृढ बनाउने उद्देश्यका साथ साउथ एसियन नेटवर्क अपरेटर्स ग्रुप (स्यानोग ४४) आगामी सन् २०२६ को जुलाई २२ देखि २८ सम्म काठमाडौंमा आयोजना हुने भएको छ । नेपाल नेटवर्क अपरेटर्स ग्रुप (npNOG-12) को सहकार्यमा आयोजना हुने यस कार्यक्रमले दुई दशकअघि काठमाडौंबाट सुरु भएको क्षेत्रीय सहकार्यको विरासतलाई निरन्तरता दिने आयोजकले जनाएको छ ।
स्यानोग ४४ को सुरुआत जुलाई २२ देखि २५ सम्म सञ्चालन हुने चार दिने प्राविधिक कार्यशालाबाट हुनेछ । नेपाल नेटवर्क अपरेटर्स ग्रुप (npNOG) ले सञ्चालन गर्ने यी ‘ह्यान्ड्स-अन’ (व्यावहारिक) प्रशिक्षणमा नेपालसहित दक्षिण एसियाका नेटवर्क इन्जिनियर तथा प्राविधिकहरूलाई उदीयमान नेटवर्क प्रविधि, नेटवर्क इन्जिनियरिङ, इन्टरनेट पूर्वाधार तथा सञ्चालनसम्बन्धी विभिन्न विषयमा प्रयोगात्मक तालिम प्रदान गरिनेछ ।
त्यसपछि जुलाई २६ देखि २८ सम्म तीन दिने स्यानोग ४४ सम्मेलन आयोजना हुनेछ । सम्मेलनमा विश्वका अग्रणी प्राविधिक विज्ञहरूको मुख्य वक्तव्य (कीनोट), प्राविधिक पूर्ण सत्र (Technical Plenary), प्राविधिक प्रस्तुति, प्यानल छलफल तथा नेटवर्क सञ्चालन, साइबर सुरक्षा, राउटिङ, डिएनएस (DNS), पियरिङ र उदीयमान प्रविधिसम्बन्धी विषयमा विस्तृत छलफल हुने कार्यक्रम रहेको छ । सहभागीहरूले इन्टरनेट सञ्चालन तथा पूर्वाधारसँग सम्बन्धित नवीनतम प्रविधि, अनुभव र अभ्यासबारे जानकारी आदानप्रदान गर्ने अवसर पनि प्राप्त गर्नेछन् ।
स्यानोग दक्षिण एसियाका नेटवर्क अपरेटर, इन्टरनेट सेवा प्रदायक (आईएसपी), अनुसन्धानकर्ता तथा प्राविधिक समुदायका लागि शिक्षा, ज्ञान आदानप्रदान र सहकार्य प्रवर्द्धन गर्ने प्रमुख गैर व्यावसायिक मञ्च हो । यसले क्षेत्रीय स्तरमा इन्टरनेट सञ्चालनसम्बन्धी दक्षता अभिवृद्धि, सहकार्य र अनुभव आदानप्रदानलाई प्रोत्साहन गर्दै आएको छ ।
आयोजकका अनुसार स्यानोग ४४ ले दक्षिण एसियाभरका नेटवर्क विज्ञ, इन्टरनेट सेवा प्रदायक, अनुसन्धानकर्ता, शैक्षिक संस्था, नीति निर्माता तथा प्रविधि क्षेत्रमा कार्यरत पेशाकर्मीहरूलाई एउटै मञ्चमा ल्याउनेछ । कार्यक्रमले क्षेत्रीय सहकार्य विस्तार गर्नुका साथै सुरक्षित, भरपर्दो र दिगो इन्टरनेट पूर्वाधार विकासका लागि आवश्यक ज्ञान, अनुभव र उत्कृष्ट अभ्यास आदानप्रदानमा योगदान पुर्याउने विश्वास गरिएको छ ।
आयोजकले स्यानोग ४४ मा सहभागी हुन इच्छुक व्यक्ति तथा संस्थाहरूका लागि दर्ता, कार्यक्रम तालिका, वक्ता तथा अन्य गतिविधिसम्बन्धी विस्तृत जानकारी आगामी दिनहरूमा सार्वजनिक गरिने जनाएको छ । साथै कार्यक्रमसँग सम्बन्धित पछिल्ला अद्यावधिकका लागि आधिकारिक माध्यमहरू नियमित रूपमा अवलोकन गर्न आग्रह गरिएको छ ।
