आईसीटी समाचार
काठमाडौं । नेपाली प्रविधि कम्पनी सोसयरले सूचना सुरक्षा व्यवस्थापनसम्बन्धी अन्तर्राष्ट्रिय मापदण्ड आईएसओरआईईसी २७००१:२०२२ प्रमाणीकरण प्राप्त गरेको छ ।
ग्राहक सम्बन्ध व्यवस्थापन (सीआरएम), ओम्नीच्यानल सञ्चार, सामाजिक सञ्जाल व्यवस्थापन, ई–कमर्स, टिकटिङ, कल तथा अटोमेसनलगायतका सेवा प्रदान गर्दै आएको सोसयरले सूचना सुरक्षा व्यवस्थापनका क्षेत्रमा अन्तर्राष्ट्रिय मापदण्डअनुसार प्रणाली कार्यान्वयन गरेको जनाएको छ ।
कम्पनीका अनुसार प्रमाणीकरणले ग्राहक तथा साझेदारका सूचना र डिजिटल सम्पत्तिको सुरक्षा, अनधिकृत पहुँच तथा सूचना चुहावटको जोखिम न्यूनीकरण र सुरक्षा घटनाको व्यवस्थापनका लागि व्यवस्थित प्रणाली स्थापित भएको प्रमाणित गर्छ ।
सोसयरका प्रमुख नीरज वैद्यले यो प्रमाणपत्रमा मात्र सीमित उपलब्धि नभएको बताए । “यो हाम्रा ग्राहक र साझेदारले हामीमाथि राख्नुभएको विश्वासप्रतिको जिम्मेवारी हो । हामी सूचना सुरक्षालाई संस्थागत संस्कृति र दैनिक कार्यप्रणालीको अभिन्न अंगका रूपमा लिन्छौँ,” उनले भने ।
पाँच वर्षदेखि सञ्चालनमा रहेको सोसयरले सोसयर कनेक्ट, सोसयर कमर्स र सोसयर एसएमएस मार्फत ग्राहक सेवा, सीआरएम, ई–कमर्स, एसएमएस, रिपोर्टिङ तथा व्यावसायिक कार्य व्यवस्थापनसम्बन्धी सेवा प्रदान गर्दै आएको छ ।
कम्पनीले आईएसओ प्रमाणीकरणसँगै ग्राहकको सूचना सुरक्षा, जोखिम व्यवस्थापन, व्यावसायिक निरन्तरता तथा नियामकीय आवश्यकताप्रतिको प्रतिबद्धता थप संस्थागत भएको जनाएको छ ।
