आईसीटी समाचार
काठमाडौं । शिक्षा, प्रविधि, सार्वजनिक नीति तथा शैक्षिक नवप्रवर्तनका क्षेत्रमा लामो अनुभव हासिल गरेका शैलेन्द्र झा शिक्षा तथा खेलकुद मन्त्रालयको सल्लाहकारमा नियुक्त भएका छन् । शिक्षा क्षेत्रको नीतिगत सुधार, सीपमूलक शिक्षाको विस्तार तथा प्रविधिमैत्री शिक्षालाई प्रभावकारी बनाउने उद्देश्यसहित उनको नियुक्ति गरिएको जनाइएको छ ।
शिक्षा प्रणाली सुधार, सार्वजनिक नीति, युवा सशक्तीकरण तथा शैक्षिक नवप्रवर्तनमा सक्रिय रहँदै आएका झा हाल अमेरिकी विदेश मन्त्रालयद्वारा सञ्चालित प्रतिष्ठित ह्युबर्ट एच हम्फ्रे फेलोसिप (२०२५/२६) अन्तर्गत अमेरिकाको भ्यान्डरबिल्ट विश्वविद्यालयमा अध्ययन तथा व्यवसायिक अनुसन्धानमा संलग्न थिए ।
उक्त कार्यक्रममार्फत उनले शिक्षा, नेतृत्व, सुशासन र सार्वजनिक नीतिसम्बन्धी अध्ययनसँगै अन्तर्राष्ट्रिय संस्थासँग सहकार्य गर्दै आएका छन् । यसअघि झा काठमाडौं महानगरपालिकाको शहरी योजना आयोगमा शिक्षा, प्रविधि तथा सामाजिक नवप्रवर्तनसम्बन्धी बोर्ड सदस्यका रूपमा कार्यरत थिए ।
सो अवधिमा उनले महानगरको शिक्षा तथा सामाजिक विकाससँग सम्बन्धित नीति निर्माण, योजना तर्जुमा, स्रोत व्यवस्थापन र अनुगमनमा नेतृत्वदायी भूमिका निर्वाह गरेका थिए ।
उनको नेतृत्वमा सीपमेला, प्राविधिक तथा व्यावसायिक शिक्षा प्रवर्द्धन, ‘बुक फ्रि फ्राइडे’, सिर्जनात्मक सिकाइ, विद्यालय सौन्दर्यीकरण, शिक्षक क्षमता विकास, अनुसन्धानमा आधारित शैक्षिक कार्यक्रम तथा विशेष विद्यालय सुदृढीकरणजस्ता कार्यक्रम सञ्चालन भएका थिए ।
झाले टिचर्स फर नेपालमा करिब आठ वर्ष सञ्चालन निर्देशक, भर्ती तथा छनोट निर्देशक र भर्ती व्यवस्थापकका रूपमा काम गरेका छन् । त्यहाँ उनले संस्थागत रणनीति, मानव स्रोत व्यवस्थापन, शिक्षक छनोट प्रणाली, नेतृत्व विकास, सञ्चार तथा साझेदारी विस्तारमा महत्वपूर्ण योगदान दिएका थिए ।
उनी बीआईटीएस लिडर इन्टरनेशनल प्रालिका संस्थापक अध्यक्ष समेत हुन् । उक्त संस्थामार्फत स्मार्ट लर्निङ, नवप्रवर्तनमा आधारित सिकाइ, अन्तरपुस्ते शिक्षा, प्राविधिक तथा व्यावसायिक तालिम, युवा उद्यमशीलता, रोजगारी प्रवर्द्धन, नेतृत्व विकास तथा संस्थागत क्षमता अभिवृद्धिसम्बन्धी विभिन्न कार्यक्रम सञ्चालन हुँदै आएका छन् ।
शैक्षिक योग्यताका हिसाबले झाले जर्मनीबाट सूचना तथा सञ्चार इन्जिनियरिङ, फिलिपिन्सबाट विकास व्यवस्थापन तथा बंगलादेशबाट एप्लाइड इकोनोमिक्समा स्नातकोत्तर उपाधि हासिल गरेका छन् । उनले नेपालको शिक्षा प्रणाली सुधारसम्बन्धी विभिन्न अनुसन्धान समेत गरेका छन् ।
दक्षिण कोरिया, केन्या, बंगलादेश, अष्ट्रेलिया, चिली, थाइल्यान्ड, भारत, फिलिपिन्स तथा युरोपका विभिन्न मुलुकमा आयोजित शिक्षा, नेतृत्व, विपद् जोखिम न्यूनीकरण, सार्वजनिक नीति तथा नवप्रवर्तनसम्बन्धी अन्तर्राष्ट्रिय सम्मेलन र कार्यशालामा उनले नेपालको प्रतिनिधित्व गरिसकेका छन् ।
शिक्षा प्रशासन, सार्वजनिक नीति, सुशासन, नेतृत्व विकास, रणनीतिक योजना, उद्यमशीलता, परियोजना व्यवस्थापन, प्रविधि तथा नवप्रवर्तन उनका प्रमुख विशेषज्ञताका क्षेत्र हुन् ।
शिक्षा सुधार, युवा विकास, राजनीतिक नेतृत्व, सामाजिक रूपान्तरण तथा सार्वजनिक नीतिसम्बन्धी उनका विभिन्न अनुसन्धान, लेख र विश्लेषण राष्ट्रिय तथा अन्तर्राष्ट्रिय प्रकाशनमा प्रकाशित भएका छन् ।
मन्त्रालयमा सल्लाहकारका रूपमा उनको नियुक्तिसँगै विद्यालय शिक्षा सुधार, सीपमूलक शिक्षा विस्तार, डिजिटल शिक्षाको प्रवर्द्धन, अनुसन्धानमा आधारित नीति निर्माण तथा शिक्षा क्षेत्रमा नवीन सोच र प्रभावकारी कार्यान्वयनले थप गति लिने अपेक्षा गरिएको छ ।
