आईसीटी समाचार
काठमाडौं । डिजिटल सेवामार्फत विश्वभरका नेपालीहरूलाई जोड्दै आएको नेपालको सर्वाधिक लोकप्रिय प्लेटफर्म हाम्रो पात्रोले आफ्नो रेमिट्यान्स सेवा, हाम्रो पात्रो रेमिटमार्फत एक विशेष सामाजिक उत्तरदायित्व कार्यक्रमको शुरुवात गरेको छ ।
“Send Local, Support Local” भन्ने मूल नाराका साथ अगाडि बढिरहेको हाम्रो पात्रो रेमिटको यस पहल अन्तर्गत अस्ट्रेलिया र संयुक्त राज्य अमेरिकाबाट नेपाल पैसा पठाउँदा लाग्ने सेवा शुल्क (Transaction Fee) को निश्चित अंश देशभरका निम्न वर्गीय विद्यार्थीहरूलाई सानो सहयोग तथा समर्थन गर्न खर्च गरिनेछ ।
यस अभियानको पहिलो चरण सिन्धुपाल्चोकको चौतारा, साँगा चोक गढी नगरपालिका स्थित श्री बाङबा आधारभूत विद्यालयका विद्यार्थीहरूलाई आवश्यक पर्ने स्कुल ब्याग,पेन्सिलहरू र कापीहरू वितरण गरेर शुभारम्भ गरियो ।
शनिबार भएको वितरण कार्यक्रमलाई उक्त विद्यालयका विद्यार्थी, शिक्षक तथा विद्यार्थीका परिवारजनहरूले हार्दिक स्वागत र कृतज्ञताका साथ ग्रहण गरेका थिए ।
“यस उदार सहयोगका लागि हामी हृदयदेखि नै कृतज्ञ छौँ । यस्ता पहलहरूले शब्दभन्दा धेरै ठूलो अर्थ बोकेको हुन्छ, किनभने यसले हाम्रा विद्यार्थीहरूलाई टाढाबाटै भए पनि कसैले उनीहरूको भविष्य प्रति चिन्ता र माया राख्छ भन्ने अनुभूति गराउँछ । आगामी दिनहरूमा पनि यस्ता प्रेरणादायी अभियानहरू निरन्तर सञ्चालन भइरहोस् भन्ने हाम्रो अपेक्षा छ । हाम्रो पात्रो रेमिटको यो सहयोगले यी साना बालमस्तिष्कहरूमा आशा र उत्साह थपेको छ र कहिलेकाहीँ यही आशा नै उज्ज्वल भविष्यतर्फ अघि बढ्ने सबैभन्दा ठूलो शक्ति बन्ने गर्दछ ।”
विद्यालयका प्रधानाध्यापक निर्मला श्रेष्ठले यस पहलप्रति हार्दिक आभार व्यक्त गरेका छन् । हाम्रो पात्रो रेमिटको यस प्रयासले विपन्न तथा जेहेन्दार विद्यार्थीहरूको शैक्षिक वातावरणमा प्रत्यक्ष सुधार ल्याउने विश्वास कम्पनीले लिएको छ ।
“हाम्रो पात्रो रेमिट मार्फत प्रयोगकर्ताहरूले पैसा पठाउँदा, उक्त ट्रान्सफर केवल प्रयोगकर्ताको परिवारसम्म मात्र होइन, उहाँहरूको समुदायसम्म पुग्छ। यो अभियान हामीमाथि विश्वास राखेर कारोबार गर्ने सम्पूर्ण प्रयोगकर्ताहरूलाई धन्यवाद व्यक्त गर्ने तरिका हो ।” हाम्रो पात्रोको फिनटेक अपरेशनका निर्देशक सुदिना गौतमले भनिन् ।
आगामी दिनमा यस अभियानलाई देशका अन्य दुर्गम क्षेत्रका विद्यालयहरूमा समेत विस्तार गर्दै लैजाने हाम्रो पात्रो रेमिटको योजना रहेको पनि उनले थपिन् । हाम्रो पात्रो रेमिटले अमेरिका र अष्ट्रेलियाबाट सरल, सुरक्षित र द्रुत डिजिटल प्रविधि मार्फत नेपालमा रकम पठाउने सुविधा प्रदान गर्दै आएको छ ।
