आईसीटी समाचार
काठमाडौं । नागढुंगा–सिस्नेखोला सुरुङमार्ग सञ्चालनमा ल्याउने तयारी भइरहेका बेला यसको प्रयोगबापत लाग्ने शुल्कलाई डिजिटल माध्यमबाट संकलन गर्ने व्यवस्था मिलाइने भएको छ । यसका लागि नेपाल ट्रक यातायात व्यवसायी महासंघ र सानिमा बैंकबीच सुरुङमार्ग प्रयोग गर्ने सवारी साधनबाट शुल्क संकलनलाई नगदरहित बनाउनेसम्बन्धी सम्झौता भएको छ ।
सम्झौतापछि सुरुङमार्गमा प्रवेश तथा उपभोगबापतको शुल्क आरएफआईडी र क्यूआर कोडमार्फत भुक्तानी गर्न सकिने व्यवस्था हुनेछ । आरएफआईडी प्रणालीबाट सवारीसाधनको पहिचान गरी शुल्क व्यवस्थापन गरिनेछ भने सवारी धनीले क्यूआर कोड स्क्यान गरेर शुल्क तिर्न सक्नेछन् ।
यसबाट नगद बोकेर शुल्क बुझाउनुपर्ने बाध्यता हट्नुका साथै भुक्तानी प्रक्रिया छरितो, सुरक्षित र पारदर्शी हुने अपेक्षा गरिएको छ । सम्झौतापत्रमा नेपाल ट्रक यातायात व्यवसायी महासंघका अध्यक्ष राजेन्द्र विक्रम बाँनिया र सानिमा बैंकका प्रमुख निक्षेप अधिकृत हेमराज सञ्ज्यालले हस्ताक्षर गरेका छन् ।
सरकारले सडक बोर्ड ऐन, २०५८ को व्यवस्थाअनुसार नागढुंगा सुरुङमार्ग प्रयोग गर्ने सवारीसाधनबाट उपभोग शुल्क उठाउने निर्णय गरिसकेको छ । यसका लागि राजपत्रमा सूचना प्रकाशित गरी सवारीसाधनको वर्गअनुसार शुल्क समेत निर्धारण गरिएको छ ।
निर्धारित दरअनुसार कार, भ्यान, पिकअप, ट्याक्टर, माइक्रोबसलगायत हलुका सवारीसाधनले काठमाडौं प्रवेश गर्दा ६५ रुपैयाँ र बाहिरिँदा ६० रुपैयाँ शुल्क तिर्नुपर्नेछ । मिनीबस तथा मिनी ट्रक/टिपरका लागि प्रवेश शुल्क ११५ रुपैयाँ र बाहिरिने शुल्क ८० रुपैयाँ तोकिएको छ ।
त्यसैगरी, बस तथा सिंगल रियर एक्सल ट्रकले प्रवेश गर्दा २६० रुपैयाँ र बाहिरिँदा २०० रुपैयाँ तिर्नुपर्नेछ । मल्टी एक्सल ट्रक, भारी सवारीसाधन तथा हेभी इक्विपमेन्टका लागि प्रवेश शुल्क ६०० रुपैयाँ र बाहिरिने शुल्क २५० रुपैयाँ निर्धारण गरिएको छ ।
महासंघका अध्यक्ष बाँनियाले डिजिटल भुक्तानी व्यवस्था लागू भएपछि सुरुङमार्ग नियमित प्रयोग गर्ने ट्रक तथा मालवाहक सवारी व्यवसायीलाई शुल्क तिर्न सहज हुने बताए । आरएफआईडी तथा क्यूआर प्रविधिको प्रयोगले शुल्क संकलनलाई व्यवस्थित गर्नुका साथै यातायात क्षेत्रमा डिजिटल कारोबारलाई थप प्रोत्साहन गर्ने उनको भनाइ छ ।
नेपालकै पहिलो सडक सुरुङमार्गका रूपमा नागढुंगा–सिस्नेखोला सुरुङ सञ्चालनमा आएपछि यातायात पूर्वाधारसँगै डिजिटल सेवा प्रवाहको क्षेत्रमा पनि नयाँ अभ्यास सुरु हुने अपेक्षा गरिएको छ ।
