आईसीटी समाचार
काठमाडौं । ताप्लेजुङस्थित प्रसिद्ध तीर्थस्थल पाथीभरा मन्दिर क्षेत्रमा दर्शनार्थीहरूलाई सहज सञ्चार सुविधा उपलब्ध गराउने उद्देश्यले फोरजी सेवा सञ्चालनमा ल्याइएको छ ।
पाथीभरा क्षेत्र विकास समितिको पहलमा नेपाल दूरसञ्चार कम्पनी लिमिटेड, दूरसञ्चार कार्यालय इलामसँग २०८० चैत २० गते सम्झौता सम्पन्न भएको थियो । सोही सम्झौताअनुसार बिटिएस टावर निर्माण कार्य सम्पन्न भएपछि आजदेखि फोरजी सेवा औपचारिक रूपमा सञ्चालनमा आएको हो ।
फोरजी सेवा सञ्चालनसँगै अब पाथीभरा दर्शन गर्न आउने भक्तजनहरूले सहज र गुणस्तरीय सञ्चार सेवा उपयोग गर्न सक्ने छन् । साथै, अनलाइन दान प्रणालीमार्फत भेटी व्यवस्थापनलाई अझ पारदर्शी, व्यवस्थित तथा प्रविधिमैत्री बनाउने अपेक्षा गरिएको पाथीभरा क्षेत्र विकास समितिका कार्यकारी निर्देशक प्रजिन हाङबाङले जानकारी दिए ।
यस टावरबाट पाथीभरा क्षेत्रसँगै फक्ताङलुङ गाउँपालिका लगायत आसपासका बासिन्दा पनि लाभान्वित हुने बताइएको छ ।
