आईसीटी समाचार
काठमाडौं । माइक्रोसफ्टले विन्डोज ११ को नयाँ आउटलुक एपमा अफलाइन सपोर्टलाई थप सुधार गरेको छ । अब प्रयोगकर्ताले इन्टरनेट जडान नभएको अवस्थामा पनि इमेल तयार पार्नुका साथै त्यसमा फाइल एटेचमेन्ट गर्न सक्ने भएका छन् ।
नयाँ सुविधाअनुसार अफलाइन अवस्थामा तयार गरिएका इमेलहरू इन्टरनेट पुन: जडान भएपछि स्वत: पठाइनेछन् । यसले यात्रा वा कमजोर इन्टरनेट पहुँच भएको अवस्थामा पनि प्रयोगकर्तालाई सहज रूपमा काम गर्न सहयोग गर्ने अपेक्षा गरिएको छ ।
माइक्रोसफ्टले विगत केही वर्षदेखि प्रयोगकर्तालाई क्लासिक आउटलुकबाट नयाँ वेब आधारित आउटलुक एपमा स्थानान्तरण गराउने प्रयास गर्दै आएको छ । कम्पनीले नयाँ आउटलुकलाई थप आधुनिक, छिटो र सुविधा सम्पन्न बनाउने क्रममा विभिन्न सुधारहरू गर्दै आएको छ ।
विन्डोज लेटेस्टका अनुसार, माइक्रोसफ्टले सन् २०२५ को अक्टोबरदेखि नयाँ आउटलुकमा अफलाइन एटेचमेन्ट सुविधाको परीक्षण सुरु गरेको थियो । परीक्षणपछि यो सुविधा अहिले व्यापक रूपमा प्रयोगकर्तामाझ उपलब्ध गराउन थालिएको हो ।
नयाँ आउटलुकमा पछिल्लो समय क्यालेन्डर व्यवस्थापन, इमेल सिंक, अफलाइन पहुँचलगायतका क्षेत्रमा सुधार गरिए पनि धेरै प्रयोगकर्ताले अझै पनि क्लासिक आउटलुक वा वेब संस्करणलाई प्राथमिकता दिँदै आएका छन् ।
माइक्रोसफ्टले भने नयाँ एपलाई प्रयोगकर्ताको आवश्यकता अनुसार थप प्रभावकारी र प्रतिस्पर्धी बनाउने उद्देश्यले निरन्तर अपडेट र नयाँ सुविधा थप्ने काम जारी राखेको जनाएको छ ।
