आईसीटी समाचार
काठमाडौं । सामाजिक सञ्जाल कम्पनी मेटाले फेसबुक र इन्स्टाग्राम प्रयोगकर्ताका लागि लाइभ कमर्स तथा डिजिटल विज्ञापनलाई थप प्रभावकारी बनाउने उद्देश्यले विभिन्न नयाँ सुविधाहरू सार्वजनिक गरेको छ । कम्पनीका अनुसार यी अपडेटहरूले क्रिएटर, व्यवसायी र उपभोक्ताबीचको अन्तरक्रियालाई अझ सहज बनाउनेछन् ।
नयाँ अपडेटअन्तर्गत मेटाले आफ्नो ‘लाइभ भिडियो एड्स’ सुविधालाई इन्स्टाग्राममा विस्तार गरेको छ भने फेसबुकमा यसको विश्वव्यापी रूपमा प्रयोग सुरु गरिसकेको छ । यसबाट लाइभ प्रसारण गर्ने क्रिएटर तथा व्यवसायहरूले आफ्ना उत्पादनहरू प्रत्यक्ष रूपमा दर्शकमाझ प्रस्तुत गर्न र बिक्री बढाउन सक्ने कम्पनीको विश्वास छ ।
लाइभ सपिङ अनुभवलाई थप सशक्त बनाउन मेटाले विभिन्न कमर्स प्लेटफर्महरूसँग साझेदारीसमेत गरेको छ । यस सहकार्यमा कमेन्टसोल्ड, फायरवर्क, लाइभमीअप, स्प्री र टकसपलाइभ जस्ता कम्पनीहरू सहभागी छन् ।
फेसबुकमा थपिएको नयाँ लाइभ सपिङ टुलमार्फत व्यवसायहरूले लाइभ प्रसारणकै क्रममा एकभन्दा बढी उत्पादन प्रदर्शन गर्न सक्नेछन् । दर्शकहरूले लाइभ भिडियो हेर्दा हेर्दै उत्पादनहरूको विवरण, मूल्य तथा अन्य जानकारी हेर्न पाउनेछन्, जसका लागि उनीहरूले स्ट्रिम छोड्नुपर्ने छैन ।
यसैबीच, अनलाइन कारोबारलाई सुरक्षित बनाउन मेटाले ‘भर्चुअल कार्ड’ समर्थन पनि थपेको छ । यो सुविधामार्फत प्रयोगकर्ताले आफ्नो भिसा वा मास्टरकार्ड खाताबाट अस्थायी एकपटक प्रयोग हुने कार्ड नम्बर सिर्जना गरेर भुक्तानी गर्न सक्नेछन् । यसले व्यवसायसँग वास्तविक कार्ड विवरण साझा गर्नुपर्ने आवश्यकता हटाउने र वित्तीय सुरक्षालाई मजबुत बनाउने अपेक्षा गरिएको छ ।
कम्पनीले आफ्नो एफिलिएट मार्केटिङ कार्यक्रमलाई पनि विभिन्न देशमा विस्तार गरेको छ । भारतमा फेसबुक एफिलिएट पार्टनरका लागि फ्लिपकार्ट उपलब्ध गराइएको छ भने ब्राजिल र मेक्सिकोमा मेर्काडो लिब्रे समावेश गरिएको छ । त्यस्तै, एसियाली बजारका क्रिएटरहरूका लागि लाजाडा तथा भारतका इन्स्टाग्राम क्रिएटरहरूका लागि फ्लिपकार्ट सेवा छिट्टै उपलब्ध हुने जनाइएको छ ।
नयाँ व्यवस्थापछि क्रिएटरहरूले आफ्ना सामाग्रीमा एफिलिएट उत्पादनहरूको लिंक समावेश गर्न सक्नेछन् र बिक्रीका आधारमा कमिसन प्राप्त गर्नेछन् । साथै, २२ देशका इन्स्टाग्राम क्रिएटरहरूले अब व्यवसायिक क्याटलगबाट सिधै उत्पादन खोजेर आफ्नो पोस्ट वा भिडियोमा ट्याग गर्न सक्नेछन् ।
मेटाले आफ्नो विज्ञापन प्रणालीमा समेत महत्वपूर्ण परिवर्तन गरेको छ । अब विज्ञापनदाताले विभिन्न प्रकारका विज्ञापनहरू म्यानुअली तयार गर्नुपर्ने झन्झटबाट मुक्ति पाउनेछन् । उनीहरूले उत्पादनसम्बन्धी विवरण र आवश्यक क्रिएटिभ सामाग्री उपलब्ध गराएपछि बाँकी प्रक्रिया एआई प्रणालीले स्वचालित रूपमा व्यवस्थापन गर्नेछ ।
कम्पनीका अनुसार एआईले प्रयोगकर्ताको रुचि, व्यवहार र प्राथमिकताको विश्लेषण गरेर वास्तविक समयमा सबैभन्दा उपयुक्त विज्ञापन तयार गरी प्रदर्शन गर्नेछ । डिजिटल बजारमा टिकटक लगायतका प्लेटफर्महरूले लाइभ कमर्सलाई तीव्र रूपमा विस्तार गरिरहेका बेला मेटाको यो कदमले प्रतिस्पर्धात्मक क्षमता थप बलियो बनाउने विश्लेषण गरिएको छ ।
