ओपनएआईको नयाँ अपडेट : कोडेक्सले अब विन्डोज ११ कम्प्युटर पनि नियन्त्रण गर्न सक्ने

काठमाडौं । ओपनएआईको कोडेक्स अब विन्डोज ११ कम्प्युटर पनि स्वचालित रूपमा सञ्चालन गर्न सक्षम भएको छ । ओपनएआईका अनुसार  कोडेक्सको “Computer Use” फिचर अब विन्डोज ११ प्रणालीमा पनि उपलब्ध भएको छ । यसअघि यो सुविधा केवल macOS मा मात्र सीमित थियो ।

यो फिचरमार्फत कोडेक्सले कम्प्युटरको भर्चुअल माउस र किबोर्ड प्रयोग गरी विभिन्न एपहरू नियन्त्रण गर्न सक्छ । यसले प्रोग्राम चलाउने, डाटाबेस अपडेट गर्ने, ड्यासबोर्ड तयार गर्ने, प्रोजेक्ट समीक्षा गर्ने तथा वर्कफ्लो सम्बन्धी समस्याहरू समाधान गर्ने जस्ता कार्यहरू गर्न सक्षम बनाउँछ । अब यी सबै कामहरू विन्डोज ११ मा पनि सम्भव भएको छ ।

ओपनएआईका अनुसार Computer Use फिचर सक्रिय गरेपछि प्रयोगकर्ताले @Computer वा @Paint जस्ता कमान्ड प्रयोग गरी कम्प्युटर वा विशेष एपहरूलाई सिधै उल्लेख गर्न सक्छन्, जसपछि एआईले स्वचालित रूपमा आवश्यक कार्यहरू पूरा गर्छ ।

ओपनएआईले कोडेक्सको मोबाइल एप पनि विन्डोज डेस्कटप फिचरसँग एकीकृत गरिएको जनाएको छ । यसबाट प्रयोगकर्ताले मोबाइलबाटै कम्प्युटरका काम सुरु गर्न, समीक्षा गर्न र नियन्त्रण गर्न सक्छन् । यसरी कोडेक्सले प्रयोगकर्ताको कम्प्युटरलाई टाढाबाट सञ्चालन गर्दै उनीहरू बाहिर हुँदा पनि काम निरन्तर अघि बढाउन सक्छ ।

ओपनएआईले थप जानकारी दिएको छ कि हालका लागि Computer Use फिचर कोडेक्सका सबै योजनामा उपलब्ध छ, जसमा Free र Go tiers पनि समावेश छन् । तर भविष्यमा भने यो सुविधा केवल प्रमुख Paid योजनाहरू Plus, Pro, Business र Enterprise मा मात्र सीमित रहनेछ ।