आईसीटी समाचार
अब मोरू डिजिटल वालेटका प्रयोगकर्ताले फोनपे क्युआर स्क्यान गरेर भुक्तानी गर्न सक्ने भएका छन् । यससँगै अब मोरू डिजिटल वालेटका ५ लाख बढी प्रयोगकर्ताले १४ लाख बढी फोनपे मर्चेन्टलाई क्युआर स्क्यान गरेर भुक्तानी गर्न सक्ने छन् ।
यस सम्बन्धि सम्झौता पत्रमा सोमबार नेपालको सबैभन्दा ठूलो भुक्तानी सेवा प्रणाली सञ्चालक फोनपेका सीईओ दिवस सापकोटा र मोरूका सीईओ श्रीष पौडेलले हस्ताक्षर गरेका हुन् ।
उक्त कार्यक्रममा बोल्दै फोनपेका सीईओ दिवस सापकोटाले मोरू डिजिटल वालेटलाई फोनपेको डिजिटल इकोसिस्टममा जोड्न पाउँदा खुसी लागेको र यसले अझै प्रयोगकर्तालाई सहज र सरल डिजिटल भुक्तानीको विकल्प प्रदान गर्ने बताए ।
यस्तै मोरु डिजिटल वालेटका सीईओ श्रीष पौडेलले यस सहकार्यसँगै फोनपेको वृहत नेटवर्कमा मोरूका प्रयोगकर्ताले सजिलै भुक्तानी गर्न सक्ने बताए ।
फोनपे नेपालको सबैभन्दा ठूलो भुक्तानी प्रणाली सञ्चालक हो । फोनपे नेटवर्कबाट दैनिक २ अर्ब बढीको कारोबार हुने गरेको छ ।
अहिलेसम्म फोनपेमा ६८ बैंक तथा वित्तीय संस्था आवद्ध भइसकेका छन् ।
