एक्सको नयाँ एन्ड्रोइड एप सार्वजनिक, अब पोस्ट र स्क्रोलिङ झन् छिटो

काठमाडौं । इलोन मस्कको एक्स (पूर्व ट्विटर) ले झन्डै एक वर्षको विकास प्रक्रियापछि आफ्नो नयाँ एन्ड्रोइड एप सार्वजनिक गरेको छ । नयाँ संस्करण अहिले डाउनलोड तथा अपडेटका लागि उपलब्ध भइसकेको छ ।

यसअघि एक्सको एन्ड्रोइड एप आइफोन (iOS) संस्करणको तुलनामा सुस्त र कम प्रभावकारी मानिन्थ्यो । त्यसैले कम्पनीले पुरानो एपलाई परिमार्जन गर्नुको सट्टा यसलाई शून्यबाट (From Scratch) नयाँ रूपमा विकास गरेको जनाएको छ ।

नयाँ एपमा भएका मुख्य सुधार
- एप पहिलेभन्दा धेरै छिटो खुल्ने र लोड हुने ।
- पोस्ट हेर्दा तथा स्क्रोल गर्दा अझ सहज र द्रुत अनुभव हुने ।
- म्यासेज तथा नोटिफिकेसनहरू समयमै र भरपर्दो रूपमा प्राप्त हुने ।

एक्सका प्रडक्ट प्रमुख निकिता बियरका अनुसार एन्ड्रोइड एपलाई सुधार गर्न कम्पनीले इन्जिनियरहरूको विशेष टोली गठन गरेको थियो । गत अक्टोबरमा एन्ड्रोइडमा एक्स एप डाउनलोड गर्ने प्रयोगकर्ताको सङ्ख्याले नयाँ कीर्तिमान कायम गरेपछि कम्पनीले नयाँ एप विकासलाई उच्च प्राथमिकतामा राखेको थियो ।

कम्पनीका अनुसार नयाँ एन्ड्रोइड एप पहिलेभन्दा छिटो, सहज र भरपर्दो बनेको छ । यससँगै आगामी दिनमा नयाँ फिचरहरू पनि एन्ड्रोइड प्रयोगकर्ताले अझ छिटो प्राप्त गर्ने अपेक्षा गरिएको छ ।

विश्वभर एन्ड्रोइड प्रयोगकर्ताको सङ्ख्या धेरै भएकाले यो अपडेटले एक्सको प्रयोग बढाउन मद्दत पुग्ने कम्पनीको विश्वास छ । यसअघि केही प्रयोगकर्ताले लिङ्क क्लिक गर्दा पोस्ट नखुल्ने, एप सुस्त चल्ने लगायतका समस्याको गुनासो गर्दै आएका थिए ।

थपिँदै गरेका सुविधाहरू
- पुराना एन्ड्रोइड फोनमा पर्फर्मेन्स सुधार
- लाइभ अडियो फिचर

चाँडै आउने नयाँ फिचरहरू
- नयाँ भिडियो एडिटर
- भिडियो रिप्लाई
- क्यासट्याग (Cashtags)
- कस्टम टाइमलाइन

कसरी अपडेट गर्ने ?
एन्ड्रोइड प्रयोगकर्ताले Google Play Store मा गएर आफ्नो एक्स एप अपडेट गरी नयाँ संस्करण प्रयोग गर्न सक्नुहुन्छ ।