कार्यक्रम

इन्जिनियर लोचनलाल अमात्यले प्राप्त गरे प्रोफेसनल एक्सिलेन्स आईसीटी अवार्ड २०२३

शुक्रबार, ६ पुष, २०८०

प्रोफेसनल एक्सिलेन्स आईसीटी अवार्ड २०२३ इन्जिनियर लोचनलाल अमात्यले प्राप्त गरेका छन् । शुक्रबार द सोल्टी काठमाडौंमा आयोजना भएको अपग्राड आइसिटी अवार्ड २०२३ इन एशोशिएसन विथ इन्ड्राइभको ग्राण्ड फिनाले कार्यक्रममा अमात्यले प्रोफेसनल एक्सीलेन्स आईसीटी अवार्ड पाएका हुन् ।

आईसीटी अवार्डमा प्रोफेसनल एक्सीलेन्स विधा यस वर्ष मात्र थप गरिएको विधा हो । आइसिटी क्षेत्रसँग सम्बन्धित रहेर कम्तिमा ५ वर्षको अनुभवसँगै यस क्षेत्रमा पुर्याएको महत्वपुर्ण योगदान, विशेष कामको आधारमा यो अवार्ड प्रदान गरिन्छ ।

नेपालको सूचना तथा सञ्चार प्रविधि क्षेत्रमा तीन दशकदेखि क्रियाशिल छन्, इन्जिनियर लोचन लाल अमात्य । रसियाबाट कम्प्युटर इन्जिनियरमा मास्टर्स अध्ययन गरेर नेपाल फर्किएका अमात्यले नेपाल टेलिकममा कम्प्युटर इन्जिनियर हुँदै सीटीओसम्म करिब ३२ वर्ष सेवा गरेका थिए ।

मेन्टेनेन्स कन्ट्रोल सिस्टम, बिलिङ सिस्टम लगायतका प्रणालीहरू विकास गरी टेलिकमलाई प्रविधिमैत्री बनाउन उल्लेख्य भूमिका खेल्नुभएका अमात्य क्यान महासंघको अध्यक्ष समेत निर्वाह गरिसकेका छन् ।

महासंघमा हुँदा नेपालमा आउटसोर्सिङको जग बसाल्न र क्यान इन्फोटेकलाई ठूलो स्केलमा लैजान महत्त्वपूर्ण योगदान दिएका थिए ।

सूचना प्रविधि प्रोफेसनल फोरम र सोसाइटी अफ इलेक्ट्रोनिक्स एण्ड कम्युनिकेसन इन्जिनियर्समा समेत अध्यक्षको भूमिका निर्वाह गरिसकेका अमात्य अहिले नेपाल रिसर्च एण्ड एजुकेसन नेटवर्कको अध्यक्षको रूपमा काम गरिरहेका छन् भने विद्यार्थीहरूलाई पढाउँदै समेत आएका छन् ।