स्टार्टअप एण्ड आईडिया फेस्ट २०२४ को शीर्ष प्रायोजक (टाइटल स्पोन्सर) मा टेकस्पायर कलेज हुने भएको छ । यसका लागि फेस्टको आयोजक संस्था लिभिङ विथ आइसिटी र टेकस्पायर कलेजबीच सम्झौता भएको हो । 

स्टार्टअप एण्ड आईडिया फेस्ट कात्तिक २९ र ३० गते काठमाडौंको बत्तिसपुतली स्थित अनुपम फुडल्याण्डमा आयोजना हुनेछ । कार्यक्रममा सातै प्रदेशबाट १०० बढी डिजिटल स्टार्टअप र इन्नोभेसहरूको सहभागीता रहने छ । आइसिटी अवार्ड २०२४ को प्रि-इभेन्टको रुपमा आयोजना हुने फेस्टमा द स्क्वाइड अफ चेन्जमेकर र इन्जिनियरर्स भ्लग्सको सहकार्य रहेको छ ।

यस फेस्टमा आइसिटी अवार्ड २०२४ को प्रतिस्प्रधाबाट छानिएका उत्कृष्ट १० स्टार्टअप, १२ राइजिङ स्टार इन्नोभेसन तथा उत्कृष्ट १३ प्रडक्ट र सोसल इन्नोभेसनहरू समेत शोकेस हुनेछन् । यसैगरी आयोजकले सातै प्रदेशबाट छनौट गरेर ल्याएका ३० बढी स्टार्टअपहरुको पनि यस कार्यक्रममा सहभागिता रहने छ । फेस्टको सह आयोजक स्क्वाइड अफ चेन्जमेकरले स्टिम क्याम्प, रकेट साइन्स र गेमहरु सञ्चालन गर्नेछ भने इन्जिनियर भ्लग्सले रोबोट प्रतिस्पर्धा गराउनेछ । 

कार्यक्रमले डिजिटल स्टार्टअप तथा इन्नोभेसनहरूको नेटवर्किङ, प्रवर्द्धन र थप परिस्कृत गर्नमा महत्त्वपूर्ण भूमिका खेल्ने आयोजकको विश्वास रहेको छ । २ दिनसम्म चल्ने फेस्टको अवलोकन निःशुल्क गर्न सकिने छ । सूचना प्रविधिमा रूची राख्ने वा यस क्षेत्रमा काम गरिरहेका जो कोहीले पनि फेस्टको अवलोकन गर्न सक्ने छन् । 

यसअघि सातै प्रदेशका स्टार्टअप र आइसिटी अवार्डका सेमिफाइनलिष्टहरूलाई मेन्टरिङ तथा बुटक्याम्प सेसन सञ्चालन भइसकेको छ भने कात्तिक २८ गते सेडार गेट र एफवान सफ्ट ग्रुपसँगको सहकार्यमा इन्डष्ट्री भिजिट समेत हुँदैछ । 

सातै प्रदेशका स्टार्टअपहरुबाट हरेक प्रदेशका उत्कृष्ट एक एक स्टार्टअपलाई आइसिटी अवार्डको ग्राण्ड फिनालेमा सम्मान पनि गरिने छ । अवार्डको ग्राण्ड फिनाले आगामी पुस ५ गते ह्यात रिजेन्सी बौद्धमा आयोजना हुँदैछ । 

अहिले आइसिटी अवार्ड २०२४ को लागि विभिन्न १४ विधामा छनौट प्रकृया सञ्चालनमा रहेको छ । फेस्टमै अवार्डको स्टार्टअप, प्रडक्ट, राइजिङ स्टार र सोसियल इन्नोभेसन विधाका सेमिफाइनलिष्टहरूलाई अवलोकनकर्ताले भोट समेत गर्न सक्ने छन् ।