एआईको कारण धेरै चीजहरू सजिलो भएका छन् । घण्टौं लाग्ने काम अब केही मिनेटमै पूरा गर्न सकिन्छ, तर यसको केही नकारात्मक असरहरू पनि छन्, जसलाई सामना गर्न कहिलेकाहीँ गाह्रो पर्न सक्छ । यही समस्यासँग जुध्न बेलायत सरकारले नयाँ कानुन ल्याएको छ । बेलायत पहिलो यस्तो देश बनेको छ, जसले एआईमार्फत बच्चाहरूका ‘आपत्तिजनक’ तस्वीर बनाउनु अपराध मानेको छ । सरकारले हालै यस कानुनलाई प्रभावकारी रूपमा लागू गर्न आदेश दिएको छ ।  

सरकारले स्पष्ट रूपमा भनेको छ कि एआईको प्रयोगका लागि केही सीमा हुनुपर्छ । यसको दुरुपयोगले आम नागरिकका लागि गम्भीर समस्या खडा गर्न सक्छ । यही रोक्न नयाँ कानुन लागू गरिएको छ । यदि कसैले एआईको सहायताले बाल यौन शोषण सामग्री वा बच्चाहरूका ‘आपत्तिजनक’ तस्वीरहरू सिर्जना गरेमा, उसलाई ५ वर्षसम्मको जेल सजाय हुन सक्छ । नयाँ कानुनअनुसार बच्चाहरूका अश्लील तस्वीरहरू बनाउन प्रयोग हुने सफ्टवेयरको प्रयोगलाई पनि अपराध मानिनेछ ।  

बेलायतमा एआईमार्फत तयार पारिएको ‘पीडोफाइल म्यानुअल’ राख्न पनि अवैध हुनेछ । यस्तो सामग्रीले मानिसहरूलाई बच्चाहरूको यौन शोषणका लागि एआई प्रयोग गर्न सिकाउने भएकाले यसलाई प्रतिबन्धित गरिएको छ । यदि कसैले यस्तो म्यानुअल राखेमा, उसलाई ३ वर्षसम्मको जेल सजाय हुन सक्छ ।  

मिडिया रिपोर्टहरूअनुसार, सरकारकी मन्त्री यवेट कूपरले आइतबार भनेकी छिन् कि यो वास्तवमै चिन्ताजनक विषय हो । अनलाइन बाल यौन शोषण सामग्रीको वृद्धि भईरहेको छ, साथै अनलाइनमार्फत किशोरहरूलाई प्रभावमा पार्ने कार्य पनि बढिरहेको छ, जुन निकै गम्भीर कुरा हो ।  

उनी भन्छिन् कि एआई सफ्टवेयरले अपराधीहरूलाई बाल यौन शोषण सम्बन्धी तस्वीरहरू सजिलै बनाउन मद्दत गरिरहेका छन् । यसको मतलब यस्तो अपराधमा संलग्न व्यक्तिहरू बच्चाहरूको तस्वीरलाई विकृत गरिरहेका छन् र तिनको माध्यमबाट युवाहरूलाई फसाउने प्रयास गरिरहेका छन् । उनले यसलाई ‘सबैभन्दा घिनलाग्दो अपराध’ भनेकी छिन् ।   

उनका अनुसार, नयाँ कानुनमा बाल यौन शोषणका लागि प्रयोग गरिएका एआई मोडेलहरूमा प्रतिबन्ध लगाइनेछ । साथै, उनले अन्य देशहरूलाई पनि यस्तै कदम उठाउन अनुरोध गर्दै भनिन्, ‘अन्य देशहरूले अहिले यसो गरेका छैनन्, तर मलाई आशा छ कि तिनीहरूले पनि यसलाई अनुसरण गर्नेछन् । ’  

बेलायती सरकारले भनेको छ कि एआई सफ्टवेयरहरू प्रयोग गरेर वास्तविक बच्चाहरूको तस्वीरलाई नग्न बनाइन्छ, जसबाट बाल यौन शोषण सामग्री बनाइन्छ। मन्त्री कूपरका अनुसार, हालैको अनुसन्धानले देखाएको छ कि बेलायतभर करिब ५ लाख बालबालिकाहरू यौन शोषणको शिकार भएका छन् । प्रत्येक वर्ष यस प्रकारका घटनाहरू सार्वजनिक भइरहन्छन्, र अनलाइनमार्फत हुने यस्ता घटनाहरूको संख्या पनि तीव्र रूपमा बढ्दै गएको छ ।