आईसीटी समाचार
काठमाडौं । युरोपेली मुलुकहरूमा साइबर आक्रमणका घटना बढ्न थालेपछि इटालीले सरकारी प्रणाली, महत्त्वपूर्ण पूर्वाधार र निजी क्षेत्रको डिजिटल सुरक्षालाई प्राथमिकतामा राख्दै नयाँ रणनीति अघि सारेको छ । सम्भावित आक्रमणबाट सार्वजनिक सेवा अवरुद्ध हुन नदिन सुरक्षा संयन्त्रबीचको समन्वय, सूचना आदानप्रदान र प्रविधिमा लगानी बढाउने निर्णय गरिएको छ ।
इटालीको आन्तरिक मन्त्रालयका अनुसार मंगलबार बसेको सार्वजनिक व्यवस्था तथा सुरक्षा राष्ट्रिय समितिको बैठकले साइबर जोखिम सामना गर्न विभिन्न उपाय अवलम्बन गर्ने सहमति गरेको हो । गृहमन्त्री मत्तेओ पियानतेदोसीको अध्यक्षतामा बसेको बैठकमा सरकारी निकायका प्रतिनिधि तथा सुरक्षा अधिकारीहरूले पछिल्लो साइबर जोखिमको अवस्थाबारे समीक्षा गरेका थिए ।
बैठकमा युरोपका विभिन्न देशमा हालै भएका साइबर आक्रमण, सरकारी तथा संवेदनशील प्रणालीको सुरक्षा अवस्था र अत्यावश्यक सेवाको निरन्तरताका विषयमा छलफल भएको थियो । साइबर आक्रमणका कारण सरकारी सेवा, आर्थिक गतिविधि तथा महत्त्वपूर्ण पूर्वाधारमा पर्न सक्ने असरलाई ध्यानमा राख्दै पूर्वतयारी र प्रतिकार्य क्षमता बढाउनुपर्ने निष्कर्ष निकालिएको मन्त्रालयले जनाएको छ ।
समितिले हालैका साइबर आक्रमणका घटनामा अनुसन्धान जारी रहे पनि तिनको उद्देश्य केवल प्राविधिक क्षति पुर्याउनुमा सीमित नरहेको औँल्याएको छ । यस्ता गतिविधिबाट सामाजिक तथा राजनीतिक अस्थिरता सिर्जना गर्ने, सर्वसाधारणमा अनावश्यक भय फैलाउने र लक्षित संस्था तथा निकायको प्रतिष्ठामा आँच पुर्याउने प्रयास भएको बैठकको निष्कर्ष छ ।
सरकारी प्रशासन र महत्त्वपूर्ण पूर्वाधारसँगै व्यावसायिक संस्था तथा सर्वसाधारणसमेत साइबर जोखिमको निशानामा पर्न सक्ने भएकाले समग्र सुरक्षा प्रणालीलाई प्रभावकारी बनाउनुपर्नेमा बैठकले जोड दिएको थियो ।
यसका लागि प्रहरी, गुप्तचर निकाय र साइबर सुरक्षा हेर्ने संस्थाबीच सहकार्य थप सुदृढ गरिनेछ । साइबर आक्रमणसम्बन्धी अनुसन्धान, सम्भावित जोखिमको पहिचान र आवश्यक सूचना तत्काल आदानप्रदान गर्न सम्बन्धित निकायलाई थप सक्रिय बनाइने निर्णय भएको छ ।
सरकारी निकायमा मात्र नभई निजी क्षेत्रका संस्थासँग पनि साइबर जोखिमसम्बन्धी सूचना साझेदारीको दायरा विस्तार गरिने भएको छ । यसले सम्भावित आक्रमणबारे समयमै जानकारी प्राप्त गर्न र क्षति हुनुअघि नै प्रतिरक्षात्मक कदम चाल्न सहयोग पुग्ने अपेक्षा गरिएको छ ।
त्यस्तै, डिजिटल प्रणालीको सुरक्षा क्षमता बढाउन र साइबर आक्रमण भइहाले तत्काल प्रतिकार्य गर्न सक्ने संयन्त्र विकास गर्न थप लगानी गरिने मन्त्रालयले जनाएको छ । अत्यावश्यक सार्वजनिक सेवा निरन्तर सञ्चालन भइरहने सुनिश्चितताका लागि पनि आवश्यक सुरक्षा उपाय अपनाइनेछ ।
इटालीको यो निर्णयले साइबर सुरक्षालाई केवल प्राविधिक विषयका रूपमा नभई राष्ट्रिय सुरक्षा र सार्वजनिक सेवाको निरन्तरतासँग जोडिएको महत्त्वपूर्ण चुनौतीका रूपमा लिएको देखाउँछ । साथै, बढ्दो डिजिटल जोखिम सामना गर्न सरकारी तथा निजी क्षेत्र र युरोपेली मुलुकहरूबीच सहकार्य आवश्यक रहेको सन्देश दिएको छ ।
