आईसीटी समाचार
काठमाडौं । सूचना तथा सञ्चारमन्त्री डा. विक्रम तिमिल्सिनाले नेपाल टेलिकमलाई सेवाग्राहीलाई अझ छिटो, सहज र प्रविधिमैत्री सेवा उपलब्ध गराउन निर्देशन दिएका छन् । उनले सेवा प्रवाहमा डिजिटल प्रणालीको प्रभावकारी कार्यान्वयनसँगै ग्राहकको व्यक्तिगत विवरणको सुरक्षा सुनिश्चित गर्न पनि जोड दिएका छन् ।
मंगलबार सुन्धारास्थित नेपाल टेलिकमको सूचना प्रविधि निर्देशनालय अन्तर्गतको बिजनेस सपोर्ट सिस्टम (बीएसएस) विभाग तथा दूरसञ्चार कार्यालयको निरीक्षणका क्रममा मन्त्री तिमिल्सिनाले सेवा प्रवाहको अवस्था, डिजिटल प्रणाली र ग्राहक सेवाबारे जानकारी लिएका थिए ।
निरीक्षणका क्रममा टेलिकमका प्रबन्धक शालिकराम सुवेदीले सूचना प्रविधिमा आधारित सेवा सञ्चालन, बिलिङ प्रणाली र ग्राहक व्यवस्थापनसम्बन्धी कार्यप्रणालीबारे जानकारी गराएका थिए । त्यसपछि मन्त्री तिमिल्सिनाले कार्यालयमा पुगेका सेवाग्राहीसँग प्रत्यक्ष संवाद गर्दै सेवा प्राप्त गर्ने अनुभवबारे प्रतिक्रिया संकलन गरेका थिए ।
सेवाग्राहीहरूले नयाँ सिम कार्ड, ई-सिम, बिल भुक्तानी, टेलिफोन तथा इन्टरनेट सेवामा पहिलेको तुलनामा छिटो सेवा पाएको र लामो समय लाइनमा बस्न नपरेको बताएका थिए ।
निरीक्षणपछि मन्त्री तिमिल्सिनाले ग्राहकका विवरण सुरक्षित रूपमा डिजिटल डाटाबेसमा व्यवस्थापन गर्न र एकपटक विवरण अद्यावधिक गरिसकेपछि पुन: सेवा लिँदा बारम्बार उही कागजात पेश गर्नुपर्ने झन्झट हटाउन टेलिकम व्यवस्थापनलाई निर्देशन दिए ।
उनले सेवा प्रवाहलाई थप पारदर्शी, भरपर्दो र ग्राहकमैत्री बनाउन आवश्यक सुधारलाई तीव्रता दिन पनि आग्रह गरे । यसैबीच, सुन्धारा दूरसञ्चार कार्यालयका प्रमुख निर्मलराज चटौतले टेलिकमले अधिकांश सेवालाई क्रमश: अनलाइनमा रूपान्तरण गरिरहेको जानकारी दिए ।
उनका अनुसार नयाँ सिम कार्डका लागि अनलाइन आवेदन, केवाईसी अद्यावधिक, शुल्क भुक्तानी, गुनासो दर्ता तथा गुनासोको अवस्थाबारे अनलाइन ट्र्याकिङ गर्न सकिने व्यवस्था विकास गरिएको छ ।
उनले अनलाइनबाट आवेदन दिएका ग्राहकले आफूलाई पायक पर्ने सेवा केन्द्रबाट सिम कार्ड प्राप्त गर्न सक्ने तथा ई–सिम सेवा भने कार्यालयमै उपस्थित नभई अनलाइनमार्फत सक्रिय गर्न सकिने बताए ।
ग्राहकलाई एउटै स्थानबाट आवश्यक सबै सेवा उपलब्ध गराउने उद्देश्यले ‘फ्रन्ट हेल्प डेस्क’ स्थापना गरी ‘वान स्टप सर्भिस’ सञ्चालनमा ल्याइएको पनि उनले जानकारी दिए ।
निरीक्षणको अन्त्यमा सञ्चारमन्त्री तिमिल्सिनाले आधुनिक डिजिटल सेवा विस्तारसँगै सेवा गुणस्तर, ग्राहक सन्तुष्टि र व्यक्तिगत सूचना सुरक्षालाई उच्च प्राथमिकतामा राखेर काम गर्न नेपाल टेलिकमलाई निर्देशन दिएका छन् ।
