आईसीटी समाचार
काठमाडौं । मोबाइल फोन आधुनिक जीवनको अभिन्न हिस्सा बनिसकेको छ । सञ्चार, सूचना आदानप्रदान, अध्ययन, व्यवसाय तथा मनोरञ्जनका लागि दैनिक रूपमा प्रयोग हुने मोबाइलले मानिसहरूको जीवनशैलीलाई सहज बनाएको छ । तर यसको प्रयोगका क्रममा अपनाइने केही गलत बानीले उपकरण र प्रयोगकर्ता दुवैलाई जोखिममा पार्न सक्ने विज्ञहरूले बताएका छन् ।
प्रविधि विज्ञहरूका अनुसार मोबाइल फोन चार्ज भइरहेका बेला निरन्तर प्रयोग गर्नु सुरक्षित मानिँदैन । चार्जिङसँगै गेम खेल्ने, भिडियो हेर्ने, सामाजिक सञ्जाल चलाउने वा लामो समयसम्म फोनमा कुरा गर्ने जस्ता गतिविधिले ब्याट्रीमा अतिरिक्त दबाब सिर्जना गर्न सक्छ ।
विज्ञहरूका अनुसार चार्जिङको क्रममा मोबाइल प्रयोग गर्दा फोन अत्यधिक तात्ने, ब्याट्रीको कार्य क्षमता घट्ने तथा उपकरणको आयु छोटिने जोखिम रहन्छ । अत्यधिक तापक्रमले मोबाइलको प्रोसेसर र अन्य हार्डवेयरमा समेत नकारात्मक असर पार्न सक्ने बताइएको छ ।
यस्तै, गुणस्तरहीन चार्जर, बिग्रिएको केबल वा विद्युत् आपूर्तिमा समस्या भएका अवस्थामा चार्जिङकै क्रममा मोबाइल प्रयोग गर्दा विद्युत् झट्का लाग्ने सम्भावना पनि रहन्छ । दुर्लभ अवस्थामा ब्याट्री अत्यधिक तातिएर फुल्ने, आगलागी हुने वा विस्फोट हुने जोखिम समेत हुन सक्ने विज्ञहरूको भनाइ छ ।
चार्जिङका बेला मोबाइल प्रयोग गरिरहँदा ऊर्जा खपत भइरहने भएकाले फोन पूर्ण रूपमा चार्ज हुन पनि बढी समय लाग्ने बताइएको छ । यसले ब्याट्रीको दीर्घकालीन कार्यक्षमतामा असर पुर्याउन सक्छ ।
विज्ञहरूले मोबाइल चार्ज गर्दा सक्दो कम प्रयोग गर्न, कम्पनीबाट प्रमाणित गुणस्तरीय चार्जर र केबल मात्र प्रयोग गर्न तथा फोन अत्यधिक तात्न थालेमा तत्काल प्रयोग बन्द गर्न सुझाव दिएका छन् । मोबाइल प्रयोगकर्ताको सुरक्षा तथा उपकरणको दीर्घकालीन उपयोग सुनिश्चित गर्न चार्जिङका बेला आवश्यक सावधानी अपनाउनु पर्नेमा विज्ञहरूले जोड दिएका छन् ।
