आईसीटी समाचार
काठमाडौं । गुगल ड्राइभले डाटालाई क्लाउडमा सुरक्षित राख्छ र व्यवस्थित गर्छ, जसले गर्दा तपाईंले जुनसुकै बेला आफू अनुकूल प्रयोग गर्न सक्नुहुन्छ । आज हामी यदि प्रयोगकर्ताले गुगल ड्राइभबाट झुक्किएर हटाइएको फाइल कसरी पुन: प्राप्त गर्न सकिन्छ भन्ने तरिकाहरू बताउनेछौं ।
हामीले बुझ्नुपर्छ, फाइल मेटिएपनि ३० दिनसम्म ट्र्यास फोल्डरमा रहन्छ । गुगल ड्राइभमा साझा फाइल हटाएपछि पनि केही समय अरूले हेर्न सक्छन् । तर ट्र्यासबाट पूर्ण रूपमा मेटिएपछि भने फाइल फर्काउन सकिँदैन । गुगलले प्रयोगकर्तालाई १५ जीबी नि:शुल्क क्लाउड स्टोरेज दिन्छ । त्यसपछि थप स्टोरेज चाहिनेहरूका लागि गुगल वन योजना उपलब्ध छ ।
रिकभर कसरी गर्ने ?
गुगल ड्राइभमा मेटिएका फाइलहरू एन्ड्रोइड, आईफोन, आईप्याड वा डेस्कटप ब्राउजरमार्फत पुन: प्राप्त गर्न सकिन्छ । मेटिएका फाइलहरू ३० दिनसम्म ट्र्यासमा रहने भएकाले त्यस अवधिभित्र सजिलै रिस्टोर गर्न सकिन्छ । तर, फाइल पुन: प्राप्त गर्नका लागि तपाईं उक्त फाइलको एडमिन हुनु आवश्यक हुन्छ । यदि एडमिन तपाईं होइन भने फाइल फिर्ता ल्याउन एडमिनसँग सम्पर्क गर्नुपर्छ ।
गुगल ड्राइभमा मेटाइएका फाइलहरू सजिलै पुन: फर्काउन सकिन्छ । मोबाइल वा कम्प्युटर प्रयोग गरी ट्र्यास फोल्डरमा जानुहोस् । त्यहाँ फाइलहरूलाई मेटाइएको मिति अनुसार चाहिएको फाइल खोज्न सकिन्छ । त्यसपछि सम्बन्धित फाइलमा रहेको तीन डट मेनु वा राइट क्लिक गरेर “रिस्टोर” विकल्प चयन गर्नुहोस् । यसरी चयन गरिएको फाइल पहिले रहेको स्थानमै पुन: फिर्ता हुनेछ ।
