एक वर्षमै ३१ लाख मोबाइल बैंकिङ प्रयोगकर्ता थपिएका छन् । गत वर्षको तुलनामा यस वर्ष ३१ लाख बढी नयाँ मोबाइल बैंकिङ प्रयोगकर्ता थपिएका हुन् । 

नेपाल राष्ट्र बैंकको पछिल्लो तथ्यांक अनुसार २०८० असोजसम्म २ करोड २२ लाख ८४ हजार ६२२ मोबाइल बैंकिङ प्रयोगकर्ता पुगेका छन् । 

२०७९ असोजसम्म १ करोड ९१ लाख २ हजार ६५२ मोबाइल बैंकिङ प्रयोगकर्ता रहेकोमा २०८० असोजसम्म आइपुग्दा ३१ लाख बढी थपिएर २ करोड २२ लाख ८४ हजार ६२२ पुगेका हुन् । 
राष्ट्र बैंकको तथ्यांक अनुसार १ वर्षसम्म (२०७९ असोजदेखि २०८० असोजसम्म) ३१ लाख ८१ हजार ९७० नयाँ मोबाइल बैंकिङ प्रयोगकर्ता थप भएका छन् । 

पछिल्लो समय नगदमा हुने कारोबार डिजिटल माध्यमबाट हुँदै गइरहेको छ । नगदरहित अर्थतन्त्र बनाउने योजना अनुसार विभिन्न बैंकले डिजिटल भुक्तानीलाई प्राथमिकता दिएका छन् । 

राष्ट्र बैंकका अनुसार २०८० असोजसम्म मोबाइल बैंकिङबाट २ खर्ब ७७ अर्ब ८२ करोड ४० लाख कारोबार भएको छ । मोबाइल बैंकिङ प्रयोगकर्तासँगै कारोबारमा समेत उछाल देखिएको छ । 

मोबाइल बैंकिङबाट २०७९ असोजसम्म १ खर्ब ६२ अर्ब १३ करोड ७० लाख कारोबार भएको थियो । एक वर्षको अवधिमा (२०७९ असोजदेखि २०८० असोजसम्म) मोबाइल बैंकिङबाट हुने कारोबार १ खर्ब १५ अर्ब बढीले वृद्धि भएको छ ।