काठमाडौं । नेपालको आइटी क्षेत्रमा एक निष्ठावान् व्यक्तित्वको छवि बनाएका र समग्र आइटी उद्योगको विकासमा समर्पित हुँदै गर्दा अल्पायुमा निधन हुनुभएका स्व. कर्मठ डंगोललाई आइसिटी अवार्ड २०१९ को अवसरमा मरणोपरान्त सम्मान दिइएको छ । आइटी क्षेत्रका विशिष्ट व्यक्तिहरुको उपस्थितिमा उहाँको योगदानको सम्झना गरियो । गत जनवरी ९ मा काठमाडौंमा डंगोलको निधन भएको थियो ।

अमेरिकाको मेट्रोपोलिटन स्टेट कलेजबाट स्नातकमा कम्प्युटर साइन्स र म्याथमेटिक्स सकाउनु भएका कर्मठले गुगलमा इन्जिनीयरिङ कन्ट्रयाक्टर भएर काम गर्नुभएको थियो । यसअघि उहाँले ईबेमा इन्टरनेट मार्केटिङ सोलुसन्स अन्तर्गत सिनियर म्यानेजर भएर पनि काम गर्नुभयो । तर नेपालमै बसेर आइटी इकोसिस्टमलाई योगदान दिने इच्छा पाल्नुभएका डंगोल स्वदेश फर्किनुभयो ।

यहाँ आफ्नै कम्पनी पनि खोल्नुभयो । केही वर्षपछि चर्चित मल्टीनेश्नल कम्पनी क्लाउड फ्याक्ट्रीमा नेपालको भाइस प्रेसिडेन्ट (इन्जिनियरिङ) भएर काम गर्नुभयो । पछिल्लो पटक फ्युज मेशिन्स नामक एआई कम्पनीमा एसिया प्यासिफिक क्षेत्रका लागि भाइस प्रेसिडेन्ट (टेक्नोलोजी) भएर काम सुरु गर्न गर्नुभएका डंगोलको असामयकि निधन भयो ।

उहाँले नेपालमा आइटीको विकासका लागि अधिकतम सम्वाद हुनुपर्छ मान्यता राख्नुहुन्थ्यो । विभिन्न फोरमहरुमा उहाँको सार्थक उपस्थिति रहन्थ्यो । आइटीमा प्रोफेशनल करियर बनाउन चाहनेलाई सम्बोधन गर्न खोज्नुहुन्थ्यो । युवा र स्टार्टपका उहाँ अभिभावक र मागनिर्देशक हुनुहुन्थ्यो ।

उहाँले नेपाल सरकारका आइटीसम्बन्धी नीति बनाउन सहयोग गर्नुभयो भने विभिन्न अनुसन्धानमा कार्यदल सदस्य भएर काम गर्नुभयो । स्थायी सरकार आएपछि आइटी क्षेत्र प्राथमिकता पर्नेमा आशावादी देखिनुभएका डंगोल उद्यमशीलताबाट देश र समाजलाई कसरी योगदान गर्न सकिन्छ भन्ने विषयमा विभिन्न संस्थामा रहेर पनि काम गर्नुभयो ।