आईसीटी समाचार
काठमाडौं । एप्पलको फोल्डेबल फोन आईफोन डुओको भित्री डिस्प्लेमा क्षति पुग्ने समस्या सार्वजनिक भएसँगै यसको हिन्ज प्रणालीको गुणस्तरमाथि प्रश्न उठ्न थालेको छ । फोनको डिस्प्ले चर्किने तथा बिग्रिने घटनाबारे विभिन्न रिपोर्ट सार्वजनिक भइरहेका बेला एप्पलले पनि सीमित संख्याका डिभाइसमा यस्तो समस्या देखिएको स्वीकार गरेको छ ।
समस्या देखिएका फोन साट्नका लागि सम्बन्धित प्रयोगकर्तालाई कम्पनीसँग सम्पर्क गर्न एप्पलले आग्रह गरेको छ । यद्यपि, यो समस्याको वास्तविक कारणबारे थप चासो बढिरहेका बेला चिनियाँ सञ्चारमाध्यम जिमियान न्युजले एप्पलको उत्पादन प्रक्रियामाथि प्रश्न उठाउने रिपोर्ट सार्वजनिक गरेको छ ।
रिपोर्टअनुसार, बिदाको मौसम सुरु हुनुअघि बजारमा पर्याप्त संख्यामा आईफोन डुओ उपलब्ध गराउने उद्देश्यले एप्पलले खुद्रा विक्रेताहरूमार्फत फोनको आपूर्ति बढाउन खोजिरहेको छ । यस क्रममा कम्पनीले गुणस्तर निरीक्षणका मापदण्ड खुकुलो पारेको दाबी गरिएको छ । जीएसएमएरिनाले फक्सकनका एक कर्मचारीलाई उद्धृत गर्दै उक्त विवरण सार्वजनिक गरेको हो । ती कर्मचारीको पहिचान भने खुलाइएको छैन ।
रिपोर्टमा उल्लेख भएअनुसार, आईफोन डुओको उत्पादन प्रक्रियामा यसअघि नै केही पार्टपुर्जाको समूह परिवर्तन गरिएको थियो । तर, ती परिवर्तनसँगै गुणस्तर नियन्त्रणसम्बन्धी मापदण्डमा भने कुनै फेरबदल नगरिएको कर्मचारीको भनाइ छ ।
एप्पलले भने बिदाको मौसमअघि सकेसम्म धेरै फोन बजारमा पठाउने योजनालाई प्राथमिकता दिइरहेको बताइएको छ । कम्पनीले यस वर्षको अन्त्यसम्म ७५ लाख थान आईफोन डुओ बजारमा पठाउने लक्ष्य राखेको विवरण समेत सार्वजनिक भएको छ ।
यसैबीच, युट्युब सामाग्री निर्माता क्युरियसहागीले आईफोन डुओको भित्री हिन्ज संरचनामा सम्भावित प्राविधिक कमजोरी रहेको देखाएका छन् । उनको परीक्षणले फोनको भित्री डिस्प्लेमा क्षति पुग्नुमा हिन्ज प्रणालीको बनावट समेत जिम्मेवार हुन सक्ने संकेत गरेको छ ।
डिस्प्लेमा समस्या भोगेका केही प्रयोगकर्ताले फोन खोल्दा वा प्रयोग गर्दा चर्किएको जस्तो आवाज सुनिने गरेको बताएका छन् । यस्तो आवाज हिन्जको एउटा जोड्ने भाग र माथिल्लो सपोर्ट प्लेटबीच घर्षण वा सम्पर्क हुँदा उत्पन्न भएको हुन सक्ने अनुमान गरिएको छ ।
उक्त संरचना भित्री डिस्प्लेको मध्यभागको पछाडि रहेको छ । हिन्जका अन्य भागको तुलनामा यो जोड्ने भाग निकै पातलो देखिएकाले यसको टिकाउपनमाथि पनि प्रश्न उठेको छ ।
आईफोन डुओको हिन्ज प्रणालीमा देखिएको भनिएको कमजोरी र डिस्प्लेमा भइरहेको क्षतिबीच प्रत्यक्ष सम्बन्ध छ वा छैन भन्ने विषय भने थप परीक्षणबाट पुष्टि हुन बाँकी छ । तर, उत्पादनको गुणस्तर, हिन्जको टिकाउपन र डिस्प्लेको विश्वसनीयतालाई लिएर उठेका प्रश्नले एप्पलको फोल्डेबल फोनको विश्वसनीयतामाथि बहस सिर्जना गरेको छ ।
