सन् २०२५ मा हामीले थुप्रै नयाँ प्रविधिहरूको झलक पाउने छौं । यी प्रविधिहरू पूर्ण रूपमा नयाँ नहुन सक्छन्, तर तिनको एकीकरण नयाँ हुनेछ ।

जहाँ सन् २०२४ पूरै आर्टिफिसियल इन्टेलिजेन्स (एआई) मा केन्द्रित थियो, त्यही क्रम सन् २०२५ मा अझ परिष्कृत रूपमा अघि बढ्नेछ ।

यस वर्ष अझ परिष्कृत एआई भर्सन र फाइभजी प्रविधिको उन्नत रूप हेर्न पाउनेछौं । साथै, भिआर/एआर टेक्नोलोजीमा आधारित नयाँ उत्पादनहरू सार्वजनिक हुने सम्भावना छ ।

एआर/भीआर हेडसेटको युग

सन् २०२५ मा यस प्रविधिमा क्रान्तिकारी प्रगति हुने अपेक्षा गरिएको छ । एआर÷भीआर प्रविधि धेरै समयदेखि उपलब्ध भए पनि यो हालसम्म सीमित दायरामै रहेको थियो । गूगलले यस्तो हेडसेट र स्मार्ट ग्लासको लागि विशेष अपरेटिङ सिस्टम एन्ड्रोइड एक्सआर सार्वजनिक गरिसकेको छ ।

रिपोर्टअनुसार, सन् २०२५ को सुरुवातमा स्यामसङले ग्यालक्सी ग्लास नामक उत्पादन एन्ड्रोइड एक्सआरमा आधारित भएर सार्वजनिक गर्नेछ । यसले प्रयोगकर्ताहरूलाई आँखा, हातको इशारा (जेस्चर), र आवाजको माध्यमबाट भर्चुअल दुनियाँ एक्सेस गर्न मद्दत गर्नेछ ।

मेटाले पनि क्वेस्ट ३५ मार्फत मिक्स्ड रियालिटीलाई अझ सहज र सुलभ बनाउने योजना बनाएको छ । यस वर्ष एआर÷भीआर प्रविधिको लोकप्रियता उल्लेखनीय रूपमा बढ्नेछ ।

एआईको विस्तार

सन् २०२४ मा एआईको प्रयोग मुख्यतया प्रिमियम स्मार्टफोनहरूमै सीमित थियो । सन् २०२५ मा, यो प्राविधि मिड–रेञ्ज स्मार्टफोनहरूमा पनि उपलब्ध हुने अपेक्षा छ । स्मार्टफोन बाहेक अन्य धेरै क्षेत्रहरूमा पनि एआईको प्रयोग व्यापक रूपमा देखिनेछ ।

स्मार्ट होम उपकरणहरूको चलन विश्वभरि बढिरहेको छ । यो विशेष गरी क्लिनिङ उद्योगमा देखिएको छ, जहाँ रोबोटिक भ्याकुम क्लिनरहरूको माग बढेको छ । सन् २०२५ मा धेरै नवप्रवर्तन आउनेछन्, जसले घर सफा गर्ने विधि परिवर्तन गर्नेछ ।

स्मार्टफोनहरू अझ परिष्कृत हुने

एआई जस्ता प्रविधिहरूको एकीकरणको अर्थ हो थप शक्तिशाली प्रोसेसर र उच्च क्षमताको ब्याट्री । यसका कारण स्मार्टफोनको मूल्य पनि बढ्नेछ । ब्रान्डहरूले अब आईपी ६९ रेटिङ भएका उपकरणहरू बनाउन सुरु गरेका छन्, जसले गर्दा स्मार्टफोन थप टिकाउ र सुविधायुक्त हुनेछन् ।

स्याटेलाइट इन्टरनेट

धेरै देशहरुमा अझै पनि स्याटेलाइट इन्टरनेट हालसम्म आम मानिसका लागि उपलब्ध छैन, तर सन् २०२५ मा यो सुविधा अझै विस्तार गर्ने अपेक्षा छ । स्टारलिंकले यस क्षेत्रमा प्रवेश गर्ने तयारी गरिरहेको छ । स्टारलिंक हाल विश्वका विभिन्न भागहरूमा स्याटेलाइट इन्टरनेट प्रदान गरिरहेको छ ।

क्रिप्टोकरन्सी

सन् २०२५ मा क्रिप्टोकरन्सी बजारमा फेरि उछाल आउन सक्ने सम्भावना छ । डोनाल्ड ट्रम्पको पुनः सत्ता प्राप्तिले क्रिप्टोको बजारलाई बल पु¥याउने अनुमान छ । एलन मस्कको क्रिप्टोप्रतिको झुकाव पनि यसलाई टेवा दिनेछ ।

सन् २०२५ प्रविधिको क्षेत्रमा नयाँ युगको सुरुवात हुनेछ । एआई, एआर/भीआर, र स्याटेलाइट इन्टरनेट जस्ता प्रविधिहरूले हाम्रो जीवनलाई अझ सहज, परिष्कृत र प्रभावकारी बनाउनेछन् ।