आईसीटी समाचार
काठमाडौं । इन्स्टाग्रामले एआई (Artificial Intelligence) बाट बनाइएका वा सम्पादन गरिएका सामाग्रीबारे प्रयोगकर्तालाई स्पष्ट जानकारी दिन नयाँ लेबल परीक्षण सुरु गरेको छ । अब सिर्जनाकर्ताहरूले आफूलाई “AI Creator” भनेर चिनाउन सक्ने सुविधा ल्याइएको छ । यो लेबल प्रोफाइलमा तथा पोस्ट र रील्ससँगै देखिनेछ ।
उक्त लेबलमा “यो प्रोफाइलमा AI बाट बनाइएको वा परिमार्जन गरिएको सामाग्री पोस्ट हुन्छ” भन्ने सन्देश देखाइनेछ । मेटाका अनुसार यो कदम इन्स्टाग्राममा एआई सामाग्रीबारे पारदर्शिता बढाउने उद्देश्यले ल्याइएको हो । नयाँ लेबलले पहिलेको “AI info” भन्दा अझ स्पष्ट रूपमा सामाग्री एआई प्रयोग गरेर बनाइएको जानकारी दिनेछ ।
इन्स्टाग्रामले परीक्षण गरिरहेको “AI Creator” लेबल अनिवार्य भने छैन । यसलाई प्रयोग गर्ने वा नगर्ने निर्णय पूर्ण रूपमा सिर्जनाकर्ताकै इच्छामा निर्भर रहनेछ । यसका कारण केही प्रयोगकर्ताले अझै पनि अस्पष्ट “AI info” लेबल भएका वा कुनै लेबल नै नभएका एआई सामाग्री देख्न सक्ने सम्भावना रहनेछ ।
मेटाको ओभरसाइट बोर्डका अनुसार कम्पनीले हालसम्म सबै एआई सामाग्री सही रूपमा पहिचान गर्न सकेको छैन । एआई सामाग्री पत्ता लगाउने प्रणाली अझै कमजोर भएकाले धेरै पोस्टहरू स्पष्ट जानकारीबिना नै देखिन सक्ने चिन्ता व्यक्त गरिएको छ ।
मेटाले धेरै एआई सामाग्री पोस्ट गर्ने क्रिएटरहरूलाई “AI Creator” लेबल प्रयोग गर्न प्रोत्साहन गरिरहेको छ । कम्पनीका अनुसार यसले दर्शकलाई सामाग्री बुझ्न मद्दत गर्नुका साथै विश्वास बढाउनेछ ।
तर यो सुविधा अनिवार्य नभएकाले प्रयोगकर्ताले आफ्नै इच्छाअनुसार मात्र यसलाई प्रयोग गर्न सक्नेछन् । हाल मेटाले कडा नियम लागू नगरी नरम नीति अपनाइरहेको छ । यद्यपि एआईबाट बनेका सामाग्री बढ्दै जाँदा र ती पहिचान गर्न झन् कठिन हुँदै गएपछि भविष्यमा लेबलिङ नीति अझ कडा हुन सक्ने अनुमान गरिएको छ ।
