सातै प्रदेशका स्टार्टअप तथा आईसीटी अवार्ड २०२४ का उत्कृष्ट १० स्टार्टअप, १२ राइजिङ स्टार इन्नोभेसन तथा उत्कृष्ट १३ प्रडक्ट र सोसल इन्नोभेसनहरूका लागि दुई दिने बुटक्याम्प सुरू भएको छ ।

किंग्स कलेजसँगको सहकार्यमा लिभिङ विथ आइसिटीले आयोजना गरेको बुटक्याम्प सोमबार र मंगलबार सञ्चालन हुनेछ । बुटक्याम्पमा मार्केटिङ, ब्राण्डिङ, कम्पनी दर्ता, बजार अध्ययन, इक्विटी, कस्टुमर एक्विजेसन लगायत स्टार्टअप, इन्नोभेसन तथा आईडियालाई स्केलअप गर्न सिकाइने छ । 

बुटक्याम्पपछि बुधबार सहभागीलाई नेपालका उत्कृष्ट आईटीको भ्रमणमा लगिने छ । त्यसका लागि सेडार गेट र एफवान सफ्टसँग सहकार्य गरिएको छ । त्यसपछि सहभागीहरू बिहीबार र शुक्रबार काठमाडौंको बत्तिसपुतलिस्थित अनुपम फुडल्याण्डमा आयोजना हुने स्टार्टअप एण्ड आईडिया फेस्टमा पनि सहभागी हुनेछन् ।

फेस्टमा १०० बढी स्टार्टअप तथा इन्नोभेसनहरू सहभागी हुनेछन् । फेस्टको अवलोकन निःशुल्क गर्न सकिने छ । स्टार्टअप एण्ड आईडिया फेस्टमा प्रदर्शनीसँगै कार्यक्रमको सह आयोजक समेत रहेको स्क्वाइड अफ चेन्जमेकरले स्टिम क्याम्प, रकेट साइन्स र गेमहरु सञ्चालन गर्नेछ भने इन्जिनियर भ्लग्सले रोबोट प्रतिस्पर्धा गराउनेछ ।

यसअघि सातै प्रदेशका स्टार्टअपलाई लिभिङ विथ आइसिटीले उद्योगका विज्ञ व्यक्तित्वबाट मेन्टरिङ सेसन समेत सम्पन्न गराइसकेको छ । सातै प्रदेशका स्टार्टअपहरुबाट हरेक प्रदेशका उत्कृष्ट एक एक स्टार्टअपलाई आइसिटी अवार्डको ग्राण्ड फिनालेमा सम्मान पनि गरिनेछ । 

आइसिटी अवार्ड नेपालको सूचना तथा सञ्चार प्रविधि क्षेत्रको एउटा प्रतिष्ठित कार्यक्रम हो । सन् २०१६ देखि हरेक वर्ष लिभिङ विथ आइसिटीले आयोजना गर्दै आएको आइसिटी अवार्डको यस वर्ष पनि छनौट प्रक्रिया र प्रि-ईभेन्ट विभिन्न कार्यक्रम जारी छन् । आगामी पुन ५ गते आइसिटी अवार्ड २०२४ को ग्राण्ड फिनाले ह्यात रिजेन्सी बौद्धमा हुँदैछ ।