त्रिभुवन विश्वविद्यालयको ब्याचलर अफ कम्प्युटर एप्लिकेसन (बीसीए) कोर्ष पढेका विद्यार्थीहरूले अब  सरकारी सूचना प्रविधि अधिकृत पदमा प्रतिस्पर्धा गर्न पाउने भएका छन् । 

यसअघि त्रिविले बीसीएलाई मानविकी तथा सामाजिक विज्ञान संकाय अन्तर्गत राख्दा विद्यार्थीहरूले नेपाल राष्ट्र बैंकको सूचना प्रविधि अधिकृत पदमा आवेदन दिन नपाएको विषय बाहिर आएको थियो । 

यस विषयमा बीसीए पढ्ने विद्यार्थीहरूले मानविकी तथा सामाजिक विज्ञान संकायमा राखेकै कारण आवेदन दिन नपाउने गरेको विषयमा डीनलाई ज्ञापनपत्र बुझाएका थिए ।  त्यसपछि त्रिविको चर्को आलोचना समेत भएको थियो ।

यो विषय प्रतिनिधि सभाको शिक्षा समितिमा समेत पुगेको थियो । तर अब भने राष्ट्र बैंकसँगै कृषि विकास बैंक, नेपाल प्रहरी, नेपाली सेना, नेपाल टेलिकम लगायत सरकारी सूचना प्रविधि अधिकृतमा बीसीए अध्ययन गरेकाले पनि प्रतिस्पर्धा गर्न पाउने भएका छन् । यस विषयमा त्रिविको शिक्षाध्यक्ष कार्यालयले सम्पूर्ण सरकारी निकायलाई परिपत्र समेत गरेको छ । 

त्रिविका निमित्त उपकूलपति प्रा.डा. शिवलाल भुसालले सम्पुर्ण संकायबाट उत्पादित जनशक्तिले समान तहको समान अवसर पाउने बताए । के विषय पढ्यो ? कति क्रेडिट आवर पढ्यो ? भन्ने महत्त्व हुने र फ्याकल्टीले कुनै फरक नपर्ने उनको भनाइ छ । 

यस्तै लोकसेवा आयोगले जुनसुकै संकायबाट कम्प्युटरमा स्नातक गरेको विद्यार्थी आईटी अधिकृत पदमा प्रतिस्पर्धा गर्न पाउने व्यवस्था सूचना प्रविधि विधेयकमा रहेको जनाएको छ । यसअघि राष्ट्र बैंकको आईटी अधिकृत पदमा आवेदन दिएका बीसीए अध्ययन गरेका विद्यार्थीको आवेदन रद्द नहुने समेत जनाइएको छ । 

स्थानीय तहले भने यसअघि नै बीएससी सीएसआईटी, बीआईएम, बीसीए, बीई, बीबीआईएस, बीआईएस र इलेक्ट्रोनिक कम्युनिकेसनलाई समेत एउटै दर्जामा राखेका छन् ।