फिनटेक

खल्तीबाट वर्ल्डलिंकको बिल भुक्तानी गर्दा १० प्रतिशत भ्याट फिर्ता पाइने

मंगलबार, २९ चैत, २०७८

वर्ल्डलिंक प्रयोगकर्ताहरूले खल्ती मार्फत आफ्नो बिल भुक्तानीमा भ्याट रकमको १० प्रतिशत फिर्ता पाउने भएका छन् । नेपालमै पहिलो पटक खल्तीबाट वर्ल्डलिंकको बिल भुक्तानी गर्दा भ्याट रकमको १० प्रतिशत फिर्ता पाइने भएको हो ।

पूर्व अर्थमन्त्री युवराज खतिवडाले आर्थिक विधेयक २०७६ मार्फत प्रारम्भ गरेका थिए । खल्तीले आन्तरिक राजस्व विभाग (आई आर डी) र वर्ल्डलिङ्कसँग समन्वय गरी यो नियमलाई अगाडि बढाएको छ ।

यस बाहेक खल्तीले पहिले नै वर्ल्डलिंकको बिल भुक्तानीमा १.५ प्रतिशत क्यासब्याक र अर्थतन्त्रलाई प्रोत्साहन गर्न GOCASHLESS प्रोमो कोड प्रयोग गरी रु. १०० क्यासब्याक प्रदान गरेको छ ।

अब थप १० प्रतिशत भ्याट फिर्ताले डिजिटल नेपाल तर्फ ६,५०,००० वर्ल्डलिङ्क घरपरिवारलाई सजिलै प्रत्यक्ष फाइदा पुर्याउने कम्पनीको भनाइ छ । उपभोक्ताहरूले भ्याट रकमको चार्ज गरिएको १३ प्रतिशत भ्याटको १० प्रतिशत भ्याट फिर्ता पाउने छ ।

यसका लागि खल्ती प्रयोगकर्ता उपभोक्ता वर्गको हुनु पर्ने छ साथै वर्ल्डलिङ्क जडान पनि उपभोक्ता बर्गको हुनु पर्ने छ अर्थात यो सुविधा व्यवसायिक कार्य प्रयोजनको लागि दिईने छैन l

यस नौलो सुविधा बारेमा खल्तीका प्रमुख कार्यकारी अधिकृत विनय खड्काले सबै नेपालीहरूमा वित्तीय समावेशीकरण ल्याउने दृष्टिकोणलाई अगाडी बढाउने बताए ।

‘यसका साथै हामी सरकार र अन्य निकायहरूसँग मिलेर थप सजिलो सेवा र सुविधाहरू ल्याउनका लागि नयाँ क्षेत्रहरूमा काम गर्नेछौं,’ उनले भने ।

त्यस्तै वर्ल्डलिंकका सामुहिक प्रमुख वित्तीय अधिकारी संजय कुमार साहले ‍भ्याट फिर्ताको अफरले हाम्रो डिजिटल नेपालको साझा अभियानलाई अगाडी बढाउनेछ र वर्ल्डलिङ्कका प्रयोगकर्ताहरुलाई पनि खल्ती मार्फत भुक्तानी गर्न प्रोत्साहन दिने बताए ।