ह्याकरहरूले मानिसहरूको व्यक्तिगत जानकारीमा पहुँच गर्न कुनै न कुनै उपाय पत्ता लगाइरहेका हुन्छन् । डिजिटल युगमा हाम्रो जीवन जति सहज बनेको छ, त्यति नै व्यक्तिगत डेटा सुरक्षित राख्न चुनौतीपूर्ण बनेको छ । केही त्यस्ता गल्तीहरू छन्, जुन हामीले नजानेरै बारम्बार गरिरहेका हुन्छौं, तर पछि गएर त्यसको ठूलो मूल्य चुकाउनुपर्छ ।

हालै एक साइबर सुरक्षा एजेन्सीले मानिसहरूलाई गुगल सर्चसँग सम्बन्धित चेतावनी दिएको छ । शोफोस नामक साइबर सुरक्षा संस्थाले केहि यस्ता शब्दहरूबारे भनेको छ, जुन प्रयोगकर्ताहरूले गुगलमा सर्च गर्नु हुँदैन् । यसो गर्दा गोपनीयता र सुरक्षा जोखिममा पर्न सक्छ । साइबर फर्मले प्रयोगकर्ताहरूलाई यी शब्दहरू सर्च नगर्न सुझाव दिएको छ ।

रिपोर्टअनुसार, जसले गुगलमा “Are Bengal Cats legal in Australia” टाइप गरेर सर्च गर्छ र टपमा आएको लिंकमा क्लिक गर्छ, तिनको व्यक्तिगत जानकारी अनलाइन लिक हुनसक्छ । साइबर एजेन्सीका अनुसार ह्याकरहरूले ’अस्ट्रेलिया’ शब्द प्रयोग भएको सर्च गर्ने व्यक्तिहरूलाई बढी लक्ष्य बनाउँछन् ।

शोफोस अनुसार, जब प्रयोगकर्ताहरूले सर्च रिजल्टमा टपमा आएको लिंकमा क्लिक गर्छन्, तिनको व्यक्तिगत तथा बैंक जानकारी ’गुटलोडर’ नामक प्रोग्राममार्फत चोरिन्छ । यो सफ्टवेयरले तपाईंको डिभाइस लक पनि गर्न सक्छ । ह्याकरहरूले मानिसहरूलाई अवैध लिंकमा क्लिक गराउन नयाँ–नयाँ उपायहरू अपनाउँछन् ।

साइबर सुरक्षा कम्पनीले दाबी गरेको छ कि ’बंगाल क्याट्स’ शब्द चयनात्मक छ । त्यसैले मानिसहरूले यस्तो सर्च गर्नु आवश्यक छैन् । साइबर अपराधीहरूले मानिसहरूलाई फसाउन एसईओ प्वाइजनिङ भन्ने रणनीतिको पनि प्रयोग गर्छन् ।

ह्याकरहरूको नयाँ–नयाँ तरिकाहरूका कारण मानिसहरू दिनदिनै केही गल्तीका कारण फसिरहेका हुन्छन् र जीवनभरको सम्पत्ति गुमाइरहेका छन् । यस्तोमा आफूलाई सुरक्षित राख्नु ठूलो चुनौती हो । शोफोसका अनुसार प्रयोगकर्ताहरुले सधैं दुई–फ्याक्टर प्रमाणिकरण अन गरेर राख्नुपर्छ । साथै हरेक प्लेटफर्ममा एउटै पासवर्ड राख्नबाट बच्नुपर्छ । आफ्नो सुरक्षा बलियो बनाउन समय समयमा पासवर्ड परिवर्तन गरिराख्नुपर्छ ।