काठमाडौं । नेपाल दूरसञ्चार कम्पनी लिमिटेड (नेपाल टेलिकम) ले गत आर्थिक वर्ष २०८२/८३ मा आफ्नो खुद मुनाफा उल्लेख्य रूपमा बढाएको छ । कम्पनीले सार्वजनिक गरेको अपरिष्कृत वित्तीय विवरणअनुसार एक वर्षमा खुद मुनाफा ४७ दशमलव ५८ प्रतिशतले वृद्धि भएर रु ८ अर्ब ८६ करोड ४६ लाख पुगेको हो ।

अघिल्लो आर्थिक वर्ष २०८१/८२ मा कम्पनीको खुद मुनाफा रु ६ अर्ब ६७ लाख थियो । समीक्षा अवधिमा खुद मुनाफा रु २ अर्ब ८५ करोड ७९ लाखले बढेको हो । कम्पनीको नाफामा विशेष गरी चौथो त्रैमासमा उल्लेख्य सुधार देखिएको छ ।

गत आर्थिक वर्षको वैशाखदेखि असारसम्म मात्रै टेलिकमले रु ४ अर्ब २० करोड २४ लाख ५२ हजार नाफा कमाएको छ । अघिल्लो त्रैमासमा रु ३ अर्ब १४ करोड ८० लाख १८ हजार नाफा कमाएको कम्पनीले चौथो त्रैमासमा नाफा रु १ अर्ब ५ करोड ४४ लाखले बढाएको हो ।

टेलिकमका प्रवक्ता कमल लामिछानेका अनुसार पछिल्लो समय ‘फाइबर टु द होम’ (एफटीटीएच) र जीएसएम डाटाको खपत बढ्दा कम्पनीको आम्दानीमा सकारात्मक प्रभाव परेको छ । उनका अनुसार भ्वाइस सेवाको तुलनामा डाटा खपत बढेको छ भने सञ्चालन खर्च समेत अघिल्लो वर्षको तुलनामा घटेको छ ।

“आम्दानी बढेको र खर्च घटेको कारण समग्र नाफा बढेको हो,” लामिछानेले बताए । कम्पनीले विज्ञापन, प्रायोजनलगायतका खर्च कटौतीबाट मात्रै गत आर्थिक वर्षमा करिब रु १० देखि १५ करोड बचत गरेको जनाएको छ ।

करअघिको नाफा १३ अर्ब २६ करोड
गत आर्थिक वर्षको चौथो त्रैमासिकसम्म टेलिकमको करअघिको मुनाफा रु १३ अर्ब २६ करोड ४७ लाख पुगेको छ । अघिल्लो आर्थिक वर्षमा यस्तो मुनाफा रु ९ अर्ब ८५ करोड २ लाख थियो । यस आधारमा करअघिको मुनाफा रु ३ अर्ब ४१ करोड ४५ लाख अर्थात् ३४ दशमलव ६६ प्रतिशतले बढेको हो ।

त्यस्तै, ब्याज, कर, ह्रासकट्टी तथा अमोर्टाइजेसनअघिको आम्दानी (ईबीआईटीडीए) रु २० अर्ब ४८ करोड १ लाख पुगेको छ । अघिल्लो वर्षको रु १८ अर्ब ४९ करोड ६० लाखको तुलनामा यो रकम रु १ अर्ब ९८ करोड ४१ लाख अर्थात् १० दशमलव ७३ प्रतिशत बढी हो ।

कम्पनीको कुल सञ्चालन आय पनि बढेर रु ३४ अर्ब ९५ करोड ४ लाख पुगेको छ । अघिल्लो आर्थिक वर्षमा यस्तो आय रु ३३ अर्ब ८९ करोड ४५ लाख थियो । एक वर्षमा सञ्चालन आय रु १ अर्ब ५ करोड ५९ लाख अर्थात् ३ दशमलव १२ प्रतिशतले बढेको हो । समीक्षा अवधिमा टेलिकमको कुल आय रु ३९ अर्ब १९ करोड ९६ लाख पुगेको छ । 

अघिल्लो आर्थिक वर्षमा कुल आय रु ३८ अर्ब १८ करोड ८१ लाख थियो । कुल आयमा रु १ अर्ब १ करोड १५ लाख अर्थात् २ दशमलव ६५ प्रतिशत वृद्धि भएको छ । कम्पनीको वार्षिकीकरण गरिएको प्रति सेयर आम्दानी रु ४९ दशमलव २५ रहेको छ ।

ब्याज आम्दानी घट्दा पनि मुख्य सेवाबाट बढ्यो आम्दानी
समीक्षा अवधिमा ब्याजदर घट्दै जाँदा टेलिकमको ब्याज आम्दानी भने घटेको छ । अघिल्लो आर्थिक वर्षको तुलनामा गत आर्थिक वर्षमा ब्याज आम्दानी रु ८६ करोड १९ लाख अर्थात् २२ दशमलव ८८ प्रतिशतले घटेको कम्पनीले जनाएको छ । तर, मुख्य दूरसञ्चार सेवाबाट हुने आम्दानीमा भएको वृद्धिले समग्र सञ्चालन आय र नाफा बढाउन सहयोग गरेको छ ।

विशेष गरी जीएसएम सेवातर्फको आम्दानीमा सुधार आएको छ । अघिल्लो आर्थिक वर्षको चौथो त्रैमासिकको तुलनामा गत आर्थिक वर्षको सोही अवधिमा जीएसएम सेवाबाट प्राप्त राजस्व रु ६४ करोड ५४ लाख अर्थात् २ दशमलव २८ प्रतिशतले बढेको कम्पनीले जनाएको छ ।

कम्पनीका अनुसार सेवा विस्तार, एफटीटीएचको प्रयोगमा वृद्धि तथा मोबाइल डाटाको बढ्दो खपतले आम्दानी बढाउन महत्वपूर्ण भूमिका खेलेको छ । सरकारले नेपाल टेलिकमको सेवा पहुँच र गुणस्तर सुधारलाई प्राथमिकतामा राख्दै अघि बढाएका विभिन्न सुधारात्मक कार्यक्रमको प्रभाव पनि कम्पनीको वित्तीय अवस्थामा देखिन थालेको बताइएको छ ।

शासकीय सुधारसम्बन्धी १०० कार्यसूची तथा सूचना तथा सञ्चार मन्त्रालयको नतिजामा आधारित शासकीय व्यवस्थापन प्रणालीअन्तर्गतको १० बुँदे सुधारात्मक कार्ययोजनामा समेत टेलिकमका सेवा सुधारलाई प्राथमिकता दिइएको थियो ।

गत आर्थिक वर्षको चौथो त्रैमासिकमा टेलिकमले रु १० अर्ब ३४ करोड ४७ लाख ५२ हजार कुल आम्दानी गरेको छ । अघिल्लो आर्थिक वर्षको सोही अवधिमा यस्तो आम्दानी रु ९ अर्ब ७५ करोड ६५ लाख ३९ हजार ७८२ थियो । यसअनुसार त्रैमासिक कुल आम्दानीमा समेत वृद्धि भएको छ ।

यसरी सेवा आम्दानीमा सुधार, डाटाको बढ्दो प्रयोग, खर्च नियन्त्रण र सञ्चालन दक्षतामा आएको सुधारका कारण नेपाल टेलिकमको नाफामा उल्लेख्य वृद्धि देखिएको कम्पनीको वित्तीय विवरणले देखाएको छ ।