समाचार

ओपोले गऱ्यो नयाँ व्यवसायको सूरुवात

मंगलबार, २३ कात्तिक, २०७८

‘बिल्डिंग अ बेटर फ्यूचर टूगेदर’ थिमका साथ ओपोले २०२१ ओपो डेभलपर कन्फरेन्स (ओडीसी)को आयोजना गरेको छ । सम्मेलनमार्फत ओपोले ओमोजी, रे ट्रेसिंग र हेटेरोजिनस कम्प्यूटिंग जस्ता प्रविधिहरुका साथै आफ्नो नयाँ ओपो हेल्थ एण्ड कारलिंक व्यवसायको घोषणा समेत गरेको छ ।

‘निरन्तर कनेक्टेड यो संसारमा उपकरण तथा सेवाका संख्याहरुका साथै अन्तरक्रियाका प्रवृत्तिहरु समेत वृहत तथा विविध छन् । विकासकर्ताहरु प्रयोगका विभिन्न परिवेशका साथै लामो सञ्चालन समयका लागि सक्षम हुनु आजको आवश्यकता हो ।’, ओपोका उपाध्यक्ष तथा ओपो रिसर्च ईन्स्टिच्यूटका अध्यक्ष लेभिन ल्यूले भने ।

उनले ओपो आफ्ना विकासकर्ताहरुलाई चुनौतिहरुको सामना गर्न तथा प्रयोगकर्ताहरूका लागि सुदृढ भविष्यको निर्माणमा सहकार्य तथा सशक्तिकरणका लागि समर्पित रहेको समेत बताए ।

ओपोले प्रयोगकर्ताहरु माझ उत्कृष्ट सेवा अनुभव पुऱ्याउँदै बहुसंख्यक मानिस तथा उपकरणहरुबीच प्राकृतिक अन्तरक्रियाका लागि त्रुटिरहित अन्तरसम्बन्ध स्थापित गर्दै प्रयोगकर्ता केन्द्रित सर्वव्यापी सेवा अनुभव उपलब्ध गराउने परिकल्पना गरेको छ । यस्तो भविष्यका लागि सुदृढ भिज्यूअल्स, कुशल कम्प्यूटिंगका साथै बहुसंख्यक उपकरणहरु विच घनिष्ठ जडानको आवश्यकता पर्छ ।

आफ्नो यस परिकल्पनालाई साकार पार्ने कार्यमा ओपोलाई साथ दिन विकासकर्ताहरुको क्षमता अभिबृद्धिका लागि कम्पनीले विभिन्न प्राविधिक क्षमताहरुको श्रृखंला नै सार्वजनिक गरेको छ ।