काठमाडौं । वर्डप्रेसको प्रतिष्ठित सम्मेलन ‘वर्डक्याम्प काठमाडौं २०२६’ को तयारी अन्तिम चरणमा पुगेको छ । वर्डप्रेस काठमाडौंको आयोजनामा हुने दुई दिने प्रविधि सम्मेलनमा देशभरका सफ्टवेयर इन्जिनियर, वेब विकासकर्ता, विद्यार्थी, फ्रिलान्सर तथा प्रविधि उद्यमीहरूको सहभागिता रहने भएको छ ।

सम्मेलनको पहिलो दिन ‘कन्ट्रिब्युटर डे’ आयोजना हुनेछ । यस दिन सहभागी तथा विकासकर्ताले वर्डप्रेसको मुख्य कोड, नेपाली भाषा अनुवाद, दस्तावेजीकरण, थिम तथा प्लगइन परीक्षणलगायतका क्षेत्रमा प्रत्यक्ष रूपमा योगदान गर्न सक्नेछन् ।

त्यस्तै, अनुभवी प्रशिक्षकहरूले वर्डप्रेससम्बन्धी व्यावहारिक तालिम समेत प्रदान गर्नेछन् । यसबाट सहभागीले आफ्नो प्राविधिक सीप विकास गर्नुका साथै अन्तर्राष्ट्रियस्तरको अनुभव हासिल गर्ने र व्यक्तिगत प्रोफाइल बलियो बनाउने अवसर पाउनेछन् ।

सम्मेलनको दोस्रो दिन आधुनिक प्रविधि, नि:शुल्क तथा खुला स्रोत प्रविधि, आर्टिफिसियल इन्टेलिजेन्स (एआई) र सुरक्षित वेब विकासमा केन्द्रित प्राविधिक तथा व्यावसायिक सत्र सञ्चालन हुनेछन् ।

विशेष गरी एआईको प्रयोगमार्फत छिटो तथा प्रभावकारी रूपमा सफ्टवेयर विकास गर्ने कार्यप्रणाली, यूआई/यूएक्स, स्मार्ट प्रम्प्ट लेखन, सुरक्षित कोडिङ, क्लाउड प्रणाली तथा डिजिटल भुक्तानीलगायतका विषयमा विशेषज्ञ तथा अनुभवी वक्ताले प्रस्तुति तथा तालिम दिनेछन् ।

सम्मेलनमा नेपालसहित भारत, बंगलादेश र फिलिपिन्सलगायतका देशबाट आएका प्राविधिक विज्ञ, उत्पादन व्यवस्थापक तथा प्रविधि समुदायका अगुवाहरूले आफ्ना अनुभव र ज्ञान प्रस्तुत गर्ने आयोजकले जनाएको छ ।

नेपालमै बसेर विदेशी ग्राहकसँग कसरी काम गर्ने, डिजिटल उत्पादनलाई विश्व बजारमा कसरी पुर्‍याउने र अन्तर्राष्ट्रिय बजारबाट आम्दानी गर्ने भन्ने विषयमा पनि व्यावहारिक तथा रणनीतिक छलफल हुनेछन् ।

कार्यक्रमले सूचना प्रविधि अध्ययन गरिरहेका विद्यार्थी तथा नयाँ प्रतिभाका लागि रोजगारी, इन्टर्नसिप र मेन्टरसिपका अवसरसमेत सिर्जना गर्ने आयोजकको विश्वास छ । सहभागीले विभिन्न कम्पनीका नेतृत्वसँग प्रत्यक्ष भेटघाट तथा नेटवर्किङ गर्ने, आफ्ना समस्या र नयाँ अवधारणामाथि छलफल गर्ने अवसर पाउनेछन् ।

त्यसैगरी, सहभागीका लागि आधिकारिक उपहार तथा सम्मेलनपछि आयोजना हुने अनौपचारिक कार्यक्रममा सहभागी भई प्रविधि समुदायका सदस्यसँग सम्बन्ध विस्तार गर्ने अवसर समेत रहनेछ ।

यस वर्षको सम्मेलनमा अन्तर्राष्ट्रियस्तरका प्रविधि कम्पनीहरूले प्रायोजन तथा सहभागिता जनाउने भएका छन् । ब्लुहोस्ट, होस्टिङ डटकम र जेटप्याक प्लाटिनम प्रायोजकका रूपमा जोडिएका छन् ।

त्यस्तै, टेक्सास इन्टरनेसनल कलेज एकेडेमिक पार्टनरका रूपमा रहेको छ भने एलिमेन्टर ब्रोन्ज प्रायोजक र भिलेज हाइल्यान्ड रिसोर्ट आफ्टर पार्टी प्रायोजकका रूपमा सहभागी भएको आयोजकले जनाएको छ ।

आयोजकका अनुसार सम्मेलनमा सहभागीहरूले प्रायोजक तथा साझेदार कम्पनीका प्रतिनिधिसँग प्रत्यक्ष भेटघाट र नेटवर्किङ गर्नुका साथै आफ्ना नवीन प्राविधिक अवधारणा प्रस्तुत गर्ने अवसर पाउनेछन् । यसबाट रोजगारी, व्यावसायिक सहकार्य तथा अन्तर्राष्ट्रिय प्रविधि बजारसँग जोडिने नयाँ अवसरसमेत सिर्जना हुने अपेक्षा गरिएको छ ।